Од 1 јули малку повисоки сметки за струја за тие што штедат
РКЕ одредува цени на струјата без ДДВ, па така од 1 јули годинава цената на струјата за првите два блока потрошувачи ќе се намали, за околу 7 проценти во првиот и за околу 4 проценти во вториот, а ќе има зголемување од околу 2,5 проценти за третиот и за четвртиот блок.
Од 1 јули се враќа одредбата според која на сметките за струја ќе им се пресметува и 18 проценти ДДВ наместо досегашните 10, па затоа и крајните сметки ќе бидат за некој проценти повисоки.
Семејство што досега плаќало 2500 денари за струја, од сега ќе плаќа за околу 60 денари поскапо.
Бислимоски рече дека се обиделе да бидат максимално креативни во одредување на цените за да нема големо поскапување.
Пред една година домаќинствата беа поделени во четири тарифни блокови, и оние што имаат ниска или просечна потрошувачка имаат и поевтина струја.
На почетокот на минатата година за да се избегнат ценовни шокови Владата одлучи ДДВ-то на струјата да го намали од 18 на пет проценти, а од почетокот на оваа се зголеми на 10 проценти. Таквата одредба истекува на крај на месецов.
„Доколку од 1 јули се врати ДДВ-то за струјата од 10 на 18 отсто тоа ќе значи зголемување за 2,5 отсто на крајната сметка што ја плаќаат домаќинствата со просечна потрошувачка. Ако, пак, остане ДДВ-то на 10 отсто, ќе значи намалување на крајната сметка за 4,26 отсто“, рече Бислимоски.
Тој најави дека од 1 декември ќе се врати и евтината струја преку ден, од 13 до 15 часот, со што сметките за струја на просечно домаќинство ќе се намалат за 5 проценти.