Надвор од контрола пожарите на Родос и во областа Атика

Три села и хотел во планински дел на грчкиот остров Родос и две села во Мегара, во западниот дел на областа Атика, поширокиот регион на Атина, се евакуираат поради пожарите што сè уште не се ставени под контрола, јавуваат агенциите.


Преку бројот 112 за итни случаи од жителите на селата во близина на пожарот, како во Атика, така и на Родос, беше побарано да се евакуираат.


Министерот за цивилна заштита и климатски кризи на Грција Василис Кикиљас упати апел за голема внимателност и избегнување на секаква активност што би можела да предизвика пожар.


Грчкиот премиер Кирјакос Мицотакис претпладнево беше во Националниот координативен центар за операции и управување со кризи со цел да се информира за пожарите во земјата.




Активиран е Европскиот механизам за цивилна заштита, а четворица Канаѓани од Франција и Италија пристигнаа во Грција како засилување, изјави портпаролот на пожарникарите.


Од четврток се очекува нов топлотен бран со максимални температури до 44 степени, најавија метеоролозите, а пожарникарите предупредија на „многу висок ризик“ од нови пожари. Ова се однесува на регионите околу Атина, Атика, Крит и јужниот дел на Пелопонез.


За среда во Грција се предвидуваат ветрови со брзина од 50 до 60 километри на час, но националната метеоролошка служба очекува до крајот на денот постепено да слабее. Во среда на Пелопонез се очекуваат максимални температури до 41 степен, соопшти метеоролошката служба.