САД и ЕУ бараат од Азербејџан да ја укине блокадата на коридорот Лачин

Делегација предводена од претставниците на Комитетот за надворешни односи на Сенатот на САД, Сара Аркин и Демијан Марфи  денеска беа во посета на јужната ерменска провинција Сјуник. Во тој регион  ерменскиот конвој од 19 камиони што превезувале хуманитарна помош во отцепениот регион Нагорно-Карабах е блокиран речиси две недели по затворањето на контролниот пункт од страна на Азербејџан на коридорот Лачин. Тоа е единствениот пристапен пат до Нагорно-Карабах.


Гувернерот на Сјуник, Роберт Гукасијан, на 8 август ги придружуваше американските официјални лица кои беа во посета, кои не сакаа да разговараат со медиумите. Соединетите Американски Држави и Европската Унија побараа од Азербејџан да дозволи хуманитарни резерви за Нагорно-Карабах преку коридорот Лачин.


Претходно група експерти на Обединетите нации (ОН) изразија вознемиреност поради тековната блокада на коридорот Лачин од страна на Азербејџан, која според нив доведе до тешка хуманитарна криза во отцепениот регион Нагорно-Карабах.




Тие ги повикуваат азербејџанските власти веднаш да воспостават слободно и безбедно движење на луѓе, возила и товар низ коридорот Лачин во двете насоки, во согласност со договорот за прекин на огнот од 9 ноември 2020 година.


Минатата недела, ерменската влада соопшти дека ќе се обиде да испрати 360 тони брашно, масло за јадење, шеќер и други основни прехранбени производи во Нагорно-Карабах за да го ублажи големиот недостиг на храна предизвикан од блокадата.


Но, Азербејџан одби да дозволи конвојот да помине низ контролниот пункт, додека ерменскиот заменик-министер за надворешни работи Вахан Костанијан вети дека возилата ќе останат таму „се додека е потребно“.