Рации во Германија во домовите на членови и поддржувачи на Хамас

Полицијата во Германија спроведува рации во четири региони во домовите на членовите и поддржувачите на радикалната група Хамас и други палестински организации кои се забранети во земјата, објавија федералните власти утрото на 23 ноември.


„Преземаме акција против радикалните исламисти. Со забраната на Хамас и Самидун во Германија, испративме јасен сигнал дека нема да толерираме никакво оправдување или поддршка за варварскиот терор на Хамас против Израел“, рече министерката за внатрешни работи Ненси Фезер во изјавата.


„Исламистите и антисемитите не смеат никаде да се чувствуваат безбедно“, рече таа, според објавата на министерството на мрежата Х.


Министерството за внатрешни работи соопшти дека 15 имоти биле претресени од 6:00 часот, откако судовите во четири региони наредиле рации.


 




Германија на 2 ноември ги забрани Хамас и Самидун, мрежа на солидарност со палестинските затвореници во Израел. Според официјалните податоци, во Германија има околу 450 членови на Хамас.


Министерството рече дека иако членовите на Хамас досега не извршиле „насилни акции“ во Германија, тие се обиделе да соберат средства за да и помогнат на групата во странство и „да влијаат на општествениот и политичкиот дискурс во Германија“.


Од друга страна, се наведува дека Самидун е „наклонет кон употреба на насилство и го негира правото на Израел да постои“.


Екстремистичката група Хамас, која е прогласена за терористичка од САД и ЕУ земаа околу 240 заложници за време на нападот на Израел на 7 октомври, во кој, според израелските власти, загинаа 1200 луѓе, главно цивили.


Нападот предизвика жестока израелска офанзива во Газа, управувана од Хамас, за која здравствените власти велат дека убиле повеќе од 14 000 луѓе, вклучително и повеќе од 5500 деца.