عبدالله عبدالله عزیزالله کاروان د افغانستان ویاړ وباله
د افغانستان اجرائيه رئيس د پوليسو د ځانګړي ځواک قوماندان، عزيز الله کاروان د پکتيکا او افغانستان تلپاتى وياړ وباله.
عزيز الله کاروان چې په پکتيکا کې د پوليسو د ځانګړي ځواک د صفر يو قطعې قوماندان و، د چنګاښ یا سرطان پر اوومه نېټه په کابل کې ووژل شو.
اجرائيه رئيس عبدالله عبدالله پرون د پکتيکا په مرکز ښرنه کې په دې اړه وويل:
"د شهيد عزيز الله کاروان تاريخ به د مېړانې، غيرت، وطنپالنې او له خلکو سره د مينې، قربانۍ او اتلولۍ تاريخ وي، د پکتيکا او د افغانستان د خلکو لپاره به يو تلپاتى وياړ وي."
عزيز الله کاروان چې څو- څو وارې له ځينو حملو روغ وتلى و، د وسله والو طالبانو پرضد ګڼ پوځي عمليات رهبري کړي وو.
په ولسي جرګه کې د پکتيکا يوه استازي نادرخان کټوازي د قوماندان کاروان وژنه، د افغانستان په جنوب ختیځ کې د دولت د وسلهوالو مخالفانو په وړاندې روانې مبارزې ته يو ګوزار بللى دى.
وسله والو طالبانو پر عزيز الله کاروان د شوي بريد مسووليت منلى دى.