افغانستان کې تېرو ۲۴ ساعتونو کې د کرونا له امله ۳۰ ناروغان مړه شوي

د افغانستان عامې روغتیا وزارت وایي، په تېره یوه شپه او ورځ کې ۳۰ کرونایي ناروغان مړه شوي دي.


دغه وزارت نن وویل چې تېرو ۲۴ ساعتونو کې څه باندې یو نیم زر کسان په کرونا اخته شوي دي. 


د رسمي شمېرو له مخې افغانستان کې د کرونا پېښې څه باندې ۷۳ زره او ۲۰۰ ته رسېدلي او نږدې درې زره پرې مړه شوي دي.


خو د چارو کتونکي او ان خپله چارواکو ویلي چې نارسمي شمېرې له دې څو برابره زیاتې دي.