پوتین: له اوکراین سره د صادراتو تړون کې د مسکو غوښتنې له پامه غورځول شوي
د روسیې ولسمشر ولادیمیر پوتین ادعا کوي چې له اوکراین سره د غلې د صادراتو په تړون کې د مسکو غوښتنې له پامه غورځول شوي دي.
ولسمشر ولادیمیر پوتین د جنوبي افریقا له ولسمشر سیریل رامافوسا سره په ټلیفوني تماس کې وویل چې د روسیې د غذايي موادو او کیمیاوي سرې د صادراتو پروړاندې د خنډونو د لیرې کولو په برخه کې د مسکو غوښتنې تر اوسه نه دي منل شوي.
د ملګرو ملتونو په ملاتړ د تور سمندرګي له لارې د روسیې او اوکراین د غلې د صادراتو موافقه چې تېر کال عملي شوه که تمدید نه شي د اعتبار موده یې سبا د جولای په ۱۷ مه پای ته رسېږي.
دا موافقه پر اوکراین د روسیې د ناموجه یرغل له کبله په نړۍ کې د غذايي موادو د بحران د کمولو په هدف لاسلیک شوې ده.
د دې موافقې له مخې د اوکراین په غلو بار کښتیو ته د تور سمندرګي د دهلیز له لارې د خوندي تېرېدو اجازه ورکول کېږي.
اوکراین د نړۍ په کچه د غذايي موادو تر ټولو لوی صادروونکی هېواد دی.
د ملګرو ملتونو سرمنشي انټونیو ګوټېرېش د روانې اوونۍ په پیل کې وویل چې، ولسمشر پوتین ته یې یو لیک استولی او په هغه کې یې وړاندیز ورته کړی چې د تور سمندرګي له لارې د اوکراین د غلې د صادراتو موافقه باید عملاً فعاله وساتل شي.
د رویټرز خبري آژانس د راپور له مخې ګوټېرېش وړاندیز کړی دی چې له روسیې سره د غلې د تړون د تمدید په بدل کې به روس- سلخوز بانک چې د روسیې د کرنیز بانک اړوند شرکت دی د پیسو د انتقال له نړیوال سیسټم سویفټ سره وصل شي خو پوتین ادعا کوي چې دا لیک یې نه دی لیدلی.
د ترکیې ولسمشر رجب طیب اردوغان چې د ۲۰۲۲ کال په جولای کې یې د غلې د صادراتو د موافقې په برخه کې منځګړتوب وکړ د روانې جولای میاشتې په ۱۴مه ادعا وکړه چې پوتین د دې موافقې تمدید منلی، خو کریملین سمدستي دا خبره روښانه کړه چې په دې برخه کې هيڅ راز موافقه نه ده شوې.
د ازادي راډیو د خبر د مرکزي څانګې د راپور له مخې پوتین همداراز دا شکایت هم کړی چې د صادر شوې غلې ډېره برخه شتمنو هېوادونو ته وړل کېږي نه هغو هېوادونو ته چې اړتیا ورته لري.
د روسیې او جنوبي افریقا ولسمشرانو په بېګانیو خبرو کې په اګست میاشت کې د بریکس د غونډې په اړه چې په جنوبي افریقا کې جوړېږي هم بحث وکړ.
په دې غونډه کې د پوتین ګډون وروسته له هغه له شکونو سره مخامخ شو چې د جرمونو نړیوالې محکمې په مارچ میاشت کې د نوموړي د نیولو حکم ورکړ.
کریملین تر اوسه په څرګنده نه دي ویلي چې پوتین په دې غونډه کې ګډون کوي که نه.