پاريس کې د لبنان په اړه کنفرانس؛ بېلابېلو هېوادونو يو ميليارد ډالره مرسته اعلان کړه
پرون پنجشنبې د (اکټوبر پر ۲۴مه) د شاوخوا ۷۰ هېوادونو او ۱۵ سازمانونو استازو لبنان سره د مرستو په موخه د فرانسې په پلازمېنه پاریس کې سره وکتل.
د رویټرز خبري اژانس د راپور پر بنسټ، امریکا پهدې کنفرانس کې په ټیټه سطحه ګډون کړی و.
د پاریس کنفرانس د لبنان لپاره د مالي مرستې د راټولولو په موخه رابلل شوی و.
د فرانسې د بهرنیو چارو وزیر ژان نویل باروت پهدې کنفرانس کې وویل: "له څه باندې ۸۰۰ میلیونه ډالرو چې ۳۰۰ میلیونه يې د واشنګټن لهخوا مرسته شوي، په لبنان کې به د یو میلیون بېځایه شویو لپاره د خوړو، روغتیايي او د زدهکړې په برخه کې د خدمتونو په برابرولو ولګوي."
په راپور کې راغلي، دوه سوه میلیونه ډالره نوره مرسته به د لبنان له پوځ سره وشي، چې د دې هېواد د داخلي ثبات تضمینوونکی ګڼل کېږي او همدارنګه د ملګروملتونو د ۱۷۰۱ پرېکړې پر اساس هم دا مرسته مهمه ده.
د ۲۰۰۶ کال په پرېکړهلیک کې غوښتل شوي وو، د لبنان جنوب به د هر ډول وسلهوالې ډلې یا ځواک په واک کې نهوي، خو دا پرېکړهلیک په سمه توګه پلی نهشو، ځکه د لبنان په حکومت کې سیاسي خلا او اقتصادي کمزورتیا د دې سبب شوه، چې د دې هېواد پوځ دا سیمه په واک کې ونهلري.
فرانسه چې له لبنان سره تاریخي اړیکې لري، پر دې هېواد يې اغېز له هغه مهاله چې اسراییلو په لبنان کې د حزبالله پر ډلې بریدونه پیل کړي، کم شوی دی.
په لبنان کې په وروستیو جګړو کې څه باندې ۲۵۰۰ کسان وژل شوي او نژدې دوه میلیونه بېځایه شوي دي.
د فرانسې د بهرنیو چارو وزیر وویل، اسراییلو ته يې پیغام دا دی چې اوربند وکړي.
حزبالله چې یوه پوځي او سیاسي ډله ده، د امریکا لهخوا د ترهګریز سازمان په توګه پېژندل کېږي، خو اروپايي ټولنې يې یوازې پوځي برخه د ترهګریزو سازمانونو په لېست کې شامله کړې ده.
حزبالله ډله چې د لبنان پر ډېرو جنوبي برخو کنټرول لري، سیاسي څانګه يې د لبنان په پارلمان کې څوکۍ هم لري.
د فرانسې ولسمشر امانویل ماکرون د پاریس کنفرانس په پیل کې وویل: "ډېر زیانونه، ډېر قربانیان او ډېر بریدونه د ترهګرۍ د پای سبب کېږي نه او نه هم دا بریدونه د ټولو د امنیت تضمین دي."
د رویټرز د راپور پر بنسټ، د اوربند د غوښتونو سره-سره د جګړې په میدان کې د جګړې د درېدو هیڅ نښه نه ښکاري.
د لبنان ځواکونو ویلي، د اسراییلو په هوايي بریدونو کې يې پولې ته نژدې درې سرتېري وژل شوي دي.