LDK lëshon mbledhjen e Kryesisë së Kuvendit për shkak të Speciales

Kryetari i Grupit Parlamentar të Lidhjes Demokratike të Kosovës, Avdullah Hoti, ka dalë nga mbledhja e Kryesisë së Kuvendit që po mbahet sot, pasi që sipas tij, aty po diskutohej për shfuqizimin e Ligjit për Gjykatën Speciale.


“Në pikën e tretë u diskutua për shfuqizimin e Ligjit për Dhomat e Specializuara. Ne e lëshuam mbledhjen sepse kjo çështje është e dëmshme dhe rrezikon marrëdhëniet me ndërkombëtarët”, deklaroi Hoti para mediave në Kuvendin e Kosovës.


Hoti theksoi se LDK-ja, vazhdon të mbajë qëndrim kundër kësaj nisme.


Kryesia e Kuvendit gjatë javës së kaluar nuk ka arritur ta shqyrtojë kërkesën e 43 deputetëve për shfuqizimin e Ligjit për Dhomat e Specializuara, përkatësisht të Gjykatës Speciale.


Një gjë e tillë nuk ndodhi për shkak të mungesës së kuorumit për punë, që është shkaktuar me mungesën e anëtarëve të saj në mbledhje.