Эҳтимолан Прага аз Маскав пардохти 1 миллиард кронро талаб кунад

Ҷумҳурии Чех мехоҳад ба ҳайси ҷубронпулӣ барои таркиши анбори силоҳи шаҳраки Врбетитсе дар соли 2014 аз Русия пардохти на камтар аз як миллиард крон (тахминан 48 миллион доллар)-ро талаб кунад. Дар ин бора Алена Шиллерова,  вазири молияи Чех рӯзи 10-уми май дар сӯҳбат бо телевизиони маҳаллӣ хабар дод. Чанде пеш палатаи поёнии парлумони Чех ҳам аз ҳукумат тақозо кард, ки аз Русия пардохти ҷуброни молиро талаб кунад. Матни ин талаб қарор аст дар ҳафтаҳои наздик таҳия шавад. Мақомоти Чех инчунин мехоҳанд  хароҷоти поккории маҳалли таркишро ҳам ба ин ҳисоб ворид кунанд, чун, ба гуфтаашон, ин кор аз ҳисоби буҷаи давлати Чех анҷом шудааст.


Телевизиони Чех мегӯяд, ки шояд талаби пардохти 1 миллион крон пул ниҳоӣ нахоҳад буд ва мақомоти минтақаи осебдида эҳтимолан бихоҳанд, ки ба унвони пардохти ҷуброни равонӣ ва ҳам ҷуброни адами имконияти истифодаи  ин моликият маблағи иловагии худро тақозо кунанд. Бархе вакилон ва коршинсони соҳаи ҳуқуқи байналмилалӣ шубҳа доранд, ки шонси аз Русия гирифтани ҷубронпулӣ вуҷуд дорад. Вале бархе дигар  мегӯянд, ки Прага бояд талаби худро ба Маскав пеш гузорад ва аз ин роҳ нишон диҳад, ки таҳаммули чунин корҳоро надорад.