Aluşta başlıqları şeerni suvnen temin etmek içün yañı yerastı çoqraqlarnı qıdıralar
“Bugunde bütün kaptajlarnıñ ve daa tolu derecede qullanmağan çoqraqlarnıñ pasportlarını ögrenemiz. Tehnik suvnı bergen çoqraqlarnı maşna yuvucı, ösümliklerni suvarğan ve yollarnı yuvğan işhanelerniñ ihtiyaclarına yönetmek mümkün”, – Aluşta memuriyetiniñ başı Galina Ogneva dedi.
Onıñ bildirgenine köre, şeerni suvnen temin etmek içün olarda daa bir sıra acele tedbirler bar.
“Borularnıñ ve dağ özenlerinden ve çoqraqlarından suv anbarına suv aqması içün yönetken kanallarnıñ çekilmesi – suvnıñ arttırılması içün mına böyle acele tedbirler yapıla bile. Amma bunı yapmaq içün para kerek, şunıñ içün bu mesele cumhuriyet seviyesinde al etilmeli”, – dep saya Ogneva.
“Voda Krım” Aluşta filialınıñ müdir vazivesini vaqıtndaj icra etken Tamara Paninanıñ aytqanına köre, şeerni suvnen temin etken Körbekül suv anbarınıñ kölemi 2 million 692 biñ metr kub teşkil ete.
“Şimdi künde qararnen 10 biñ metr kub, bu qullanğan sunı qarşılamay, suv anbarlarında suv eksile”, – qayd etti Panina.
Aynı zamanda, Aluşta başlıqları şeerde kün devamında sev berilüvi sıñırılanmaycaq, dep inanadıralar.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.