Минск расмийлари мухолифат лидери Тихановскаяни “эктремистик” ташкилот тузганликда айблашмоқда
Беларусда президентликка собиқ номзод Светлана Тихановская, куч ишлатар тузилмаларнинг собиқ ходимлари Александр Азаров ва Валерий Сахашчикка нисбатан эктремистик ташкилот тузганлик ёки унда иштирок этганлик бўйича жиноят иши очилди. Бу ҳақда Беларусь Ички ишлар вазирлиги маълумот тарқатди.
Бу ерда гап Тихановская ва унинг сафдошлари томонидан тузилган “Посполитое Рушение” ташкилоти ҳақида кетмоқда. Уюшган жиноятчилик ва коррупцияга қарши кураш бош бошқармаси уни “ҳарбийлашган экстремистик ташкилот” деб ҳисоблайди.
Беларусь ИИВ очилган жиноят иши юзасидан 200 дан зиёд одам текширилаётгани маълум қилган.
Ҳуқуқ-тартиботчилар иддаосига кўра, бу одамлар бошқа “экстремистик ташкилотлар” билан биргаликда Беларусга қайтиб, “диверсион, террорчилик ва агентура иши”ни олиб бориш учун “бешинчи колонна” тузиш ниятидалар.
Беларусь мухолифати лидери Светлана Тихановская ва унинг кўплаб сафдошлари 2020 йили ўзларига қарши бошланган таъқиб-тазйиқлар ортидан мамлакатни тарк этишга мажбур бўлишган.