Литва Беларусь билан чегарадаги иккита назорат-ўтказиш пунктини ёпди
Литва Беларусь билан чегарада жойлашган иккита назорат-ўтказиш масканини ёпиб қўйган. Бу ҳақда Литва ички ишлар вазирининг ўринбосари Арнольдас Абрамавичюс маълум қилди.
Мулозимга кўра, икки мамлакат чегарасидаги олтита НЎМдан ҳозирда тўрттаси ишини давом эттирмоқда.
Иккита назорат-ўтказиш масканини ёпиш қарори қўшни Польша хатти-ҳаракатлари билан мувофиқлаштирилган ҳолда амалга оширилган. Польша Беларусь билан чегарадаги битта пунктдан бошқа барча ўтиш масканларини ёпиб қўйган.
“Бу ерда минтақавий қарор бўлиши керак”, деган Абрамавичюс бу борада Польша томонининг бир томонлама қарори Литва-Беларусь чегарасидаги вазиятнинг ёмонлашишига олиб келиши мумкинлигини қайд этган.
Европа Иттифоқи ва НАТО аъзолари бўлган бу икки давлат Россиянинг “Вагнер” ХҲШ ёлланмалари Беларусга кўчирилиши муносабати билан бу мамлакат билан чегарада қўшимча хавфсизлик чораларини кўра бошлаган. Литва президенти Гитанас Науседа, ўз мамлакати хавфсизлиги учун таҳдид ортиб борган тақдирда, Беларусь билан чегарани тўла ёпиб ташланиши ҳам эҳтимолдан ҳоли эмаслигини билдирган.
Польша Беларусь билан чегарага қўшимча ҳарбийлар ва полиция бўлинмалари ҳамда жанговар вертолётлар йўлланиши ҳақида эълон қилган. Бу қарор куни кеча Беларуснинг икки ҳарбий вертолёти Польша ҳаво чегарасини бузиб киргани ортидан олинган.