Ўзбекистон бизнеси ҳам Россияга аста-секин кириб келмоқда — Злигостев
Олдин бундай компаниялар деяри йўқ эди, лекин ҳозир ўзбекистонлик тадбиркорлар Россия бизнесининг турли соҳаларида пайдо бўлмоқда, деди Россиянинг Ўзбекистондаги савдо вакили Константин Злигостев Sputnik матбуот марказида бўлиб ўтган анжуманда.
“Агар Ўзбекистон сармоясини жалб қилиш ҳақида гапирадиган бўлсак, яширмайман, улар кам, лекин муҳими, бизда маълум бир тенденция кузатилмоқда. Агар илгари сизга жасорат билан улар принципиал жиҳатдан мавжуд эмас деб жавоб берган бўлсам, энди буни аста-секин кўриб турибмиз. Гап «лангар инвесторлар» ҳақида кетмаяпти, бу якка тартибдаги тадбиркорлар, лекин улар бундай лойиҳаларни амалга оширмоқдалар”, – деди Злигостев.
Савдо вакилининг сўзларига кўра, бунинг ёрқин мисоли ва тасдиғи қатор ҳудудлар билан яқин ҳамкорликдир. Татаристон 1992 йилдан буён Ўзбекистон билан ҳамкорликда етакчи ҳисобланади. Бошқа ҳамкорлар орасида Бошқирдистон ва Челябинск ҳам бор. Улар анъанавий равишда савдо соҳасида етакчи ҳисобланади.
“Бошқирдистон делегацияси билан учрашувда ҳамкасблар ҳозирда Ўзбекистон капитали иштирокида амалга оширилаётган бир қанча лойиҳалари борлиги ҳақида маълумот беришди. Улардан энг каттаси Благовешенск шаҳрида – автотранспортлар учун тўлиқ металл газ баллонларини ишлаб чиқариш лойиҳаси. Инвестициялар ҳажми бир миллиард рублни ташкил этиши ва 70 та иш ўрни яратилиши кутилмоқда. Завод 2025 йилда ишга туширилади ва йилига 50 литрдан 200 литргача бўлган 120 минг баллон ишлаб чиқаради. 2024 йил январь ойидан бошлаб майдон қурилишини бошлаш режалаштирилган, техник-иқтисодий асослаш тасдиқлаш босқичида, смета ҳужжатлари ишлаб чиқилмоқда”, — деди Россия Федерациясининг Ўзбекистондаги савдо вакили.
Бундан ташқари, Бошқирдистонда Ўзбекистон капитали иштирокида яна бир лойиҳани амалга ошириш режалаштирилмоқда. Мамлакатдаги қурилиш жадаллиги ҳисобга олинадиган бўлса, ёғочсозлик мажмуаси Ўзбекистон томонида қизиқиш уйғотмоқда. Гап нафақат таъминот, балки ушбу хомашёни қайта ишлаш, республика ҳудудида қўшма мебель корхоналарини ташкил этиш ҳақида ҳам бормоқда.
Ўзбекистонлик инвесторлар Татаристонда фанер заводи ва у билан боғлиқ инфратузилмани қуришни режалаштирмоқда. Умумий қиймати 235 миллион рубль бўлган замонавий мажмуада 100 та янги иш ўрни яратилиб, йилига 6 минг куб метргача фанер ишлаб чиқарилади.
“Агар чуқурроқ ўргансангиз, Россия Федерациясининг бошқа ҳудудларида ҳам ўзбекистонлик инвесторлар иштирокида кўплаб ташаббус ва лойиҳалар бўлиши мумкин”, — дея қўшимча қилди Злигостев.
Шунингдек, у Ўзбекистон Инвестициялар, саноат ва савдо вазирлиги билан биргаликда ҳозирда ўзбек бизнесини молиялаштиришни жалб этиши мумкин бўлган лойиҳалар жамғармасини пухта тайёрлаш ишлари олиб борилаётганини айтди. “Ҳақиқатдан ҳам бундай лойиҳалар кўп”, — дея қўшимча қилди Россиянинг Ўзбекистондаги савдо вакили.
Инвестицион лойиҳаларни ишлаб чиқиш ва Ўзбекистон иқтисодиётининг барқарор ўсишидан ўзаро манфаатдорликни инобатга олган ҳолда, мамлакат муҳим сармоявий салоҳиятга эга ва капитал қўйилмаларни, жумладан, Россия Федерациясининг саноат секторига ҳам кўпайтириш тенденциясига эга.
Злигостевнинг таъкидлашича, сўнгги бир неча йил ичида республика ялпи ички маҳсулоти ва иқтисодиётининг ўсиш кўрсаткичлари 5 фоиздан ошди, аҳоли сони эса йилига қарийб 1 миллион кишига кўпаймоқда. Халқаро тузилмаларнинг ҳисоб-китобларига кўра, 2050 йилга келиб унинг ҳудудида 50 миллион киши истиқомат қилади. Энг муҳими, аҳолининг 60 фоиздан ортиғини ёш ва фаол аҳоли ташкил этади. Демак, Ўзбекистоннинг фаол инвестор сифатида ривожланиши, юксалиши ва мавқеини мустаҳкамлашга интилиш учун барча асослар мавжуд.