Башкортстанда елга ташып, юлдагы машинаны агызган, кешеләр агачка менеп котылган
Башкортстанда «Ауди» машинасын су агызып алып киткән, олы яшьтәге ир белән хатын һәм аларның оныгы агачка менеп котылган. Бу турыда «Башинформ» яза.
Бүген иртән Кушнаренко районында Матвеево авылы янында Сәрмәсән елгасы ташый башлый. Елга сулары юлны да баса, юлдагы «Ауди» машинасын юл кырыена агызып төшерә. Бу турыда 112 системасына хәбәр килә.
«Ауди» пассажирлары салоннан чыгу җаен таба, алар якындагы агачка менә һәм ярдәм көтә.
Урынга коткаручылар килә, кешеләрне эвакуациялиләр. Машинада өлкән яшьтәге ир белән хатын һәм аларның 14 яшьлек оныгы булган, диелә хәбәрдә.