Од вчера, 1 јануари, на државјаните на Косово повеќе не им се потребни визи за влез во Шенген зоната. Меѓу првите кои ја искористија можноста беа 50 добитници на лотаријата за турнеја во Виена, организирана од косовската влада. „Тоа е чувство кое не може да се опише“, изјави среќен патник за РСЕ на аеродромот во Приштина. Визната либерализација не важи за Шпанија, единствената Шенген земја која не ги признава косовските патни документи.
2024 се смета за изборна година не само кај нас туку и на глобално ниво поради рекордниот број изборни процеси што се очекуваат. Македонските граѓани ќе гласаат по 11- ти пат на парламентарни и по седми на претседателски избори. Ново е што прв пат ќе има премиер Албанец и ќе се гласа во среда наместо во недела. Очекувањата за кампањата, пак, се дека ќе преовладува докажување меѓу ривалите кој е поголем криминалец, а кој поголем патриот.