Новости за 13.12.2018

Смртниот биланс од денешната железничка несреќа во Турција се искачи на девет луѓе, а 47 се повредени. Тројца од повредените се во критична состојба. Меѓу загинатите е и машиновозачот. Брзиот воз, кој сообраќал од Анкара кон централната провинција Конва, удрил во локомотива која служи за инспекција на пругата. При несреќата, која се случи во 6.30 часот по локално време, два вагони од возот излетале од шините, јави Анадолија. Министерството за транспорт и инфраструктура соопшти дека локомотивата, која извршувала инспекција на пругата... Читать дальше...

Пентагон предупреди дека е неприфатлива еднострана воена акција во североисточниот дел на Сирија откако турскиот претседател Реџеп Таип Ердоган најави нова офанзива против курдските борци кои се поддржани од Соединетите држави. „Не треба да дозволиме милитантите на Исламската држава да земат здив во оваа критична точка со тоа што ќе нарушиме односите меѓу сојузниците“, изјави портпаролот на Пентагон Шон Робертсон.

Полскиот претставник кој претседава на самитот на Обединетите нации за климата Михал Кртика изјави дека меѓународните разговори влегле во критична фаза и оти тоа бара посветеност на сите вклучени страни со цел да се дојде до успешен крај на собирот. Конференцијата во Катовице на која учествуваат претставници на 200 земји денеска треба да заврши, а единствена цел е да се најдат начини за одржување на глобалното затоплување под два степена до крајот на овој век.

Во Будимпешта продолжуваат протестите против владата на премиерот Виктор Орбан и против легислативата со која се менува условите за работа. Во меѓувреме, унгарскиот парламент одобри создавање нов систем на судови со што му се дава повеќе моќ на премиерот Орбан и во овој сектор.

Унгарскиот парламент одобри создавање нов систем на судови кои ќе се занимаваат со прашања од јавната управа со што му се дава на премиерот Виктор Орбан контрола врз она што ќе стане многу важен дел од судството. Според усвоениот закон, министерот за правда ќе го има последниот збор околу именувањето, напредувањето и платите на судиите во новиот систем во кој судовите ќе решаваат за широк спектар на случаи. Тука се случаите во кои е вклучена полицијата, даночната управа, јавните набавки, локалните власти, изборите и медиумите. Читать дальше...

Стотици француски полицајци ја продолжуваат потрагата по 29 годишниот напаѓач кој со извици „Господ е голем“ на арапски јазик отвори оган во познатиот божиќен пазар во Стразбур. Во нападот загинале три лица, додека 12 други биле ранети. Француската полиција го идентификува напаѓачот како Чериф Чекат. Полицијата и со предупредување до граѓаните дека станува збор за опасна личност и затоа да не дејствуваат на своја рака.

Британската премиерка Тереза Меј, по победата на гласањето за доверба, изјави дека ја продолжува работата околу Брегзитот и оти е потребно политичарите да се обединат. „По ова гласање треба да продолжиме со работата околу спроведувањето на Брегзитот за британскиот народ и со градење подобра иднина за оваа земја“, рече таа, наведувајќи дека одговорност на пратениците на владејачката Конзервативна партија е „да ја обединат земјата која ќе работи во полза на сите“.

Во Македонија ќе биде облачно, попладне со повремени врнежи претежно од снег, а наместа ќе се формира нова снежна покривка. Утринската температура ќе се движи од минус осум до минус два, а дневната од минус три до шест степени. Во Скопје и околината слично време. Утринската температура ќе биде околу минус шест, а дневната до два степена.