Унгарската полиција отвори истрага за несреќата на Дунав

Унгарската полиција отвори истрага за причините за потонувањето на бродот во Дунав кој превезуваше туристи од Јужна Кореја, при што најмалку 7 лица загинаа, а дваесетина се водат за исчезнати. Портпаролот на полицијата, Адриан Пал на денешната прес-конференција во Будимпешта изјави дека бродот потонал веднаш по судирот со друг поголем патнички брод покрај еден од мостовите на реката Дунав.


Спасувачки екипи се на местото на несреќата и покрај обилните врнежи од дожд, а Пал истакна дека можеби ќе бидат потребни неколку денови за да се подигне бродот од дното на реката. Седум лица се спасени и хоспитализирани и се наоѓаат во стабилна состојба. Министерството за надворешни работи на Јужна Кореја соопшти дека туристите не носеле елеци за спасување.