Уставен суд - Со коментарите и прејудицирањата за помилувањето се врши притисок врз Судот
Од Уставен суд реагираат на, како што велат обидите за нивно омаловажување. Во соопштението од Судот се наведува дека таквите обиди за омаловажување со прејудицирања на судските одлуки, со политички, а не со правни аргументи, не се во интерес на напорите за изградба на владеење на правото и правната држава.
Од Судот информираат и дека донеле решение за поведување на постапка за оспорениот член 11-а од Законот за помилување.
Уставниот суд, како што посочуваат оттаму, со внимание ги следеше написите, коментарите, изјавите на претставници на одредени државни органи, дел од медиумите и поедини експерти во кои беа изнесени невистини, обиди за прејудицирање на одлуките на Уставниот суд и невистинито информирање за исходот на гласањето, но и необјективни и нестручни коментари.
Судот смета дека со коментарите и прејудицирањата, се врши директен упад и притисок за нормално функционирање на Судот и неосновано се повредува угледот на Судот и честа и личноста на уставните судии.