Нова експлозија во Кабул- најмалку две лица загинаа, 22 лица се повредени
Денешната експлозија ја погоди областа Сухтех Пул во Кабул, дом на голем дел од шиитското муслиманско население во градот. Портпаролот на полицијата назначен од талибанците изјави дека еден од ранетите е во критична состојба.
Во соопштението на својот канал Телеграм доцна денеска, ИД соопшти дека го извршила нападот. Само еден ден претходно, најмалку осум лица загинаа, а 18 беа ранети во шиитска станбена област во Кабул во експлозија за која одговорност презеде ИД.
Бомба скриена во количка натоварена со зеленчук експлодираше во Кабул
Сведок за Радио Азади, сервисот за РСЕ во Авганистан, изјави дека „силна експлозија“ погодила област исполнета со продавници во кои посетува шиитско население.
„Во моментов, амбулантни возила од областа ги превезуваат ранетите и загинатите во болниците во градот Кабул“, рече сведокот.
Џавед, жител на Кабул, на Радио Азади ги повика талибанските сили да ја заштитат нивната безбедност.
Шиитите во Авганистан моментално ги одбележуваат првите 10 дена од исламскиот свет месец Мухарам, а на 8 август верниците се собираат во џамиите и учествуваат во поворки.
По вчерашната експлозија, Канцеларијата на Мисијата за помош на Обединетите нации во Авганистан (УНАМА) на Твитер објави дека талибанските власти треба да спречат „такви индискриминирачки“ напади.
„УНАМА го осудува вчерашниот напад во мнозинската шиитска област во Кабул, кој предизвика десетици жртви. Де факто властите мора да спречат вакви индискриминирачки напади, да започнат темелна и транспарентна истрага. Нашето сочувство до семејствата на загинатите и брзо закрепнување на повредените“, се вели во соопштението.
Ричард Бенет, специјалниот известувач на ОН за човекови права за Авганистан, ја осуди експлозијата и рече дека сторителите треба да бидат изведени пред лицето на правдата.
Откако ја презедоа власта по повлекувањето на силите предводени од НАТО во август 2021 година, талибанците не успеаја да постигнат признание за својата влада, при што голем дел од Западот бара од групата да ги почитува правата на жените и малцинствата во земјата.
Талибанците тврдат дека „не знаеле“ дека Завахри бил во Авганистан
Американскиот државен секретар Антони Блинкен оваа недела рече дека Талибанците „грубо ги прекршиле“ направените договори со тоа што го сместиле и го засолниле Ајман ал-Завахри, лидерот на Ал Каеда кој беше убиен во напад на американско беспилотно летало во Кабул на почетокот на август.
Раководството на талибанците соопшти дека не знаело за присуството на Завахри во главниот град, иако извор изјавил за Радио Азади дека тој живеел во куќа за гости во сопственост на министерот за внатрешни работи, инсталиран од талибанците, Сираџудин Хакани.