د کرکټ اسیا جام سیالۍ؛ هند پاکستان ته په لوی توپیر ماتې ورکړه
د کرکټ د اسیا جام سیالیو په لړ کې هند وتوانېد پاکستان ته ماتې ورکړي.
د هند او پاکستان لوبه د اورښتونو په سبب څو واره وځنډېده او ان دوهمې ورځې ته غځول شوې وه چې بلاخره هند پکې بریا خپله کړه.
هند ټولټال ۳۵۶ مندې وکړې، خو پاکستان دغه هدف ته په رسېدو کې پاتې راغی او خپل ټول لوبغاړي یې په ۱۲۸ منډو له لاسه ورکړل.
د هند لپاره په دې لوبه کې ویرات کوهلي او کې ایل راهول سلیزې ووهلې او په بالېنګ کې بیا کولدیپ یادوف په یواځې د پاکستان پنځه لوبغاړي اوټ کړل.
هند د څلورو غوره ټيمونو په پړاو کې په دې بریا سره د جدول سر ته وخوت.
پاکستان چې تر دې دمه یې په اسیا جام کې کومه لوبه نه وه بایللې درېیم مقام ته ښکته شوی.
هند به نن سه شنبه له سریلانکا سره لوبه ولري.