د افغانستان، پاکستان او ازبکستان د سوداګرۍ درې اړخیزه ناسته ترسره شوه
د پاکستان په کوربه توب د افغانستان، پاکستان او ازبکستان د سوداګرۍ درې اړخیزه ناسته ترسره شوه.
د پاکستان د سوداګرۍ وزیر ګوهر اعجاز په خپله ایکسپاڼه په یوه بیان کې لیکلي چې دا درې اړخیزه ناسته د اقتصادي اړیکو او سیمهییز اتصال د غښتلتیا لپاره یو مهم اقدام دی.
هغه زیاته کړې چې د درې واړو هېوادونو د متقابلو ګټو لپاره د سوداګرۍ، پانګې اچونې او اړیکو روښانه لرلید موجود دی.
په دې درې اړخیزه ناسته کې د افغانستان له لوري د طالبانو د حکومت د سوداګرۍ وزارت سرپرست نورالدین عزیزي، د ازبکستان د صدراعظم مرستیال او د پاکستان د سوداګرۍ وزیر ګوهر اعجاز ګډون کړی دی.
د طالبانو د سوداګرۍ وزارت په یوه بیان کې لیکلي چې په دې ناسته کې د ترانس-افغان پروژې، درې اړخیزې سوداګرۍ او ټرانزیټ او د سیمهییز اتصال پر وړاندې په پرتو ستونزو باندې بحث وشو.