Әстерхан өлкәсе мөфтие Назыймбәк Ильясов вафат
Әстерхан өлкәсе мөфтие Назыймбәк хәзрәт Ильясов вафат. Аңа 72 яшь булган. Мөфтинең озак авырудан соң вафат булуы турында хәбәр ителә.
Россия мөселманнары Дини җыены Үзәкләштерелгән дини оешмасы сайты язуынча, Назыймбәк хәзрәт Әстерхан төбәк мөселманнар Диния нәзарәте җитәкчесе вазифасына 1999 елда билгеләнгән. Ул җитәкчелек иткән вакытта төбәктә ислам динен торгызу, мәчетләр һәм гыйбадәт йортлары төзү һәм реконструкцияләү буенча зур эш башкарыла. Әстерхан шәһәре һәм Әстерхан өлкәсе буенча мәхәлләләр саны 4тән (1990 ел) 72гә (2022 ел) кадәр җитә.
Аның төбәктә мәгариф һәм рухи-әхлак эшчәнлегенә, мәдрәсәләр ачуга керткән өлеше зур. Мөфти дин һәм җәмәгать эшлеклесе була. Аның Россия мөселманнарының Диния нәзарәте Казые сыйфатында эшчәнлеге кысаларында динара диалогны үстерү, Россия өммәтен берләштерү һәм ныгыту эшендә төбәк һәм федераль масштабтагы күп кенә чаралар тормышка ашырылды, диелә хәбәрдә.