Новости за 01.01.2019

Украинан президентан харжамашкахь дакъалаца шен лаам хиларх дIахаийтина шоумена, продюсеро Зеленский Владимира Украинан бахархошка. Керла шо тIекхача масех минот йисинчул тIаьхьа "1+1" телеканалехь кхайкхамбина цо ишта. ХIоьттинчу хьолехь хIора украинхочун кхо некъ бу аьлла Зеленскийс: хIинццалц санна вахар, я кхечу пачхьалкхе болх - некъ лаха дIавахар, ткъа кхолгIаниг ша хаьржинарг. Оршотдийнахь официалехь йолаелла Украинан президентан харжаман кампани. Украинан президент хоржур ву Зазадоккхучу-беттан 31-чохь. Читать дальше...

1994 шеран ГIуран-беттан 31-чу буса тIеман кIуьрла ерзийра оьрсийн эскарша Соьлжа-ГIала. Оццу мууьрехь, вела а къежаш, пачхьалкхерчу бахархошка, ирс а, машар а хуьлда шуна, бохура президента Ельцина. ТIедогIучу шарахь Нохчийчохь "меттахIуттур ду маьрша дахар", аьлла хетара цунна. Амма дацара цунна хууш, шен эскарш а эшош, толам боккхур буйла жимачу Нохчийчоьно.

Магнитогорскехь хилла сингаттам бахьана долуш Челябинскан кIоштахь тезетан де дIакхайкхийна кхаара, хаамбо регионан губернаторан пресс-гIуллакххоша. Документ тIехь бинчу хаамца, йоллу Челябинскан кIоштахь хIоттош ду тезет. Цу дийнахь дIахьур яц самукъадаларан программаш а,  барамаш а. ТIаьххьарчу хаамашца, Магнитогорскехь хиллачу бохамехь велла 8 стаг, тIепаза вайна лоруш ву 36 вахархо. Орцанхоша нах лоьхуш операци дIайолийчхьана карийнарг ву пхи стаг, шайлахь цхьа бер а долуш. Уьш берш дарбан цIийне кхачийна. Читать дальше...

ДIадахна 2018-гIа шо кхиаме дара аьлла Iамеркан Цхьанатоьхначу Штатийн президенто Трамп Доналда, Керлачу шарца динчу дIахьедарехь. ТIаьххьарчу шина шерачохь бинчу белхашка хьаьжча, шен администраци пачхьалкхан исторехь уггар а кхиаме ю аьлла президенто. Мексикаца а, Канадица а, Къилба Корейца а хилла барт а, ГIажарийчоьнца "къемате контракт" юкъахдаккхар а карладаьккхина Трампа. Уггар а мехала хета КIайчу цIийнан куьйгалхочунна Къилба Корейца (КНДР) шен хилла дийцарш. Цул тIаьхьа дитира КНДР-а зарратан герзах пайдаэцар. Читать дальше...

ГIалгIачохь вийна Белхороев ИбрехIим дIавоьллина иза схьаваьллачу Сурхахи эвлахь шен дена Белхороев Султан-Хьаьжина уллохь. Маршо Радионо яздира, Белхароев шен машенлелорхочуьнца цхьана вогIучу заманчохь, кIело а йина, вийна хиларх. Чевнашца дарбан хIусаме кхачийнера шофер Аушев Або. Операци йина цунна, карарчу заманчохь меттавеана иза. Белхороев дIавуллучохь гулбеллера республикехь бевзаш болу нах а, луларчу мехкашкара Iеламнах а. Чоьхьарчу гIуллакхийн министраллан хаамашца, Белхороевна тIелатар динарш "Лада Приора" олучу машенца хилла. Читать дальше...

Оьрсийчоьнан Iедалхоша дIалаьцначу шайн пачхьалкхан вахархочунна консул тIевита аьлла, тIедожийна Iамеркан Цхьанатоьхначу Штаташа. Оршотдийнахь бина цунах хаам пачхьалкхан департаментан векало, Оьрсийчоьно шайн вахархо шаьш дIалацарх хаийтича. Венехь тIеэцначу конвенцица а догIуш, шайн стагна консул тIевита аьлла, тIедиллина Iамерко. Оьрсийн къайлахчу сервисаша Москох Iамеркахо дIалаьцна, шпионалла лелош хилла иза аьлла, шеконаш кхоллаелла. ФСБ-но бинчу хаамехь яздо, лаьцначу Уилан Полнаи дуьхьал бехкталламан гIуллакх долийна хиларх. Читать дальше...

2018-чу шарахь 94 журналист вийна дуьненчохь, царех 84 леринчу Iалашонца тIелатар дина хIаллаквина ву. Дуьненаюкъарчу журналистийн федерацино (International Federation of Journalists) бина и хаам. Дуьххьара кхаа шерачохь байинчу журналистийн терахь лакхадаьлла цул хьалхарчу шерашца дуьстича. 2017-чу шарахь вийра шайн профессионалан декхарш кхочушдаран бахьанашца 82 журналист. Дахначу шарахь хаамийн гIирсашна болх бан уггар а кхераме ю аьлла билгалъяьккхинчу ОвхIанистанехь 16 журналист вийна. Тептарехь шолгIачу могIарехь ю Мексика ... Читать дальше...