Новости за 02.01.2019

Индуисташ зиярате хIуьттучу Сабаримала гIаларчу килс чу зударий битина аьлла, протесташ кхайкхийна ХIиндойчуьрчу Керала штатехь. Гулбелларш къахкорхьама бIаьргаш Iовжон газ хецна полисхоша, хаамбо хIиндойн зорбанаша. Масех некъ дIакъевлина протестхоша. Цхьаболчу дуьхьалончаша кхайкхамбора туьканийн долахошка, шайх схьакхета бохуш. Цхьаццайолчу штатан кIошташкахь полисхошна тIе тIулгаш лестадора бахархоша. Масех бIешерашкара схьа шинаридийнахь дуьххьара  аьтто баьллера шина зудчун килс чу а яхна, ламаз дан. Читать дальше...

Магнитогорскехь беллачийн терахь 19 стаге хьаладаьалла. Орцанхоша херцаршлара хьалабаьхна: зуда а, стаг а, кхо шо долу йоI а. 22 стаг каронза вуьсуш ву. Тахана, кхааридийнахь тезет хIоттийна йоллу Челябинскан кIоштахь. Хьалхо кIелхьардаьккхина 11 бутт болу бер чолхечу хьолехь ду, амма цуьнан могушаллина кхи дIа кхераме хIуммаъ дац аьлла могушаллин министро Скворцова Вероникас. Ишта цо билгалдаккхарца, йоьIан нана бераца ю. Орцан министраллан белхахоша чIагIдарца, херцарш луьстуш, нах лоьху болх еа рожехь дIахьош бу. Читать дальше...

Магнитогорскехь чуйоьжначу подъездан херцаршлахь II бутт болу бер карийна орцанхошна Бохам иккхина меттиг йохъеш хиларна а, бер дIахьарчийна хиларна а дийна дисина иза.

Мексикаца долчу дозанехь бIаьргаш Iовжон газ а хецна, мухIажирш къахкийна Iамеркахойн дозанхоша. Associated Press агенталло Iорабаьккхина и хаам. Церан хаамашца, Тихуана гIалин кIоштарчу дозанехь чекхвала гIерташ хилла 150 мухIажир. Масийтта мигрант шайна тIе тIулгаш лесто волавелча, царех лардалархьама хийцира шаьш бIаьргаш Iовжон газ аьлла дозанхойн урхаллехь. Цул совнах, сераца йинчу дуьхьалонна тIехула масех бер дехьадаккха гIерташ хилла кхелхина богIурш. ДIалаьцна 25 стаг. Associated Press агенталлан корреспонденто чIагIдарехь... Читать дальше...

Нохчийн диаспоран декъахочунна, инарлана, Урдунехь мэр а лаьттина, юьртбахаман министраллан урхаллехь хиллачу Исмаил аш-Шишани Мухьаммад Баширна кIелоярна шеконашца Зарка гIалахь дIалаьцна цхьа стаг. Байначу беттан тIаьххьарчу деношкахь тIелатар динера Исмаил аш-Шишанина. Буьйсан юккъехь 74 шо долчу инарлан хIусам чу а иккхина, цунна йиттинера вевзаш воцчу зуламхочо. Дарбан цIийне валийнера къано чолхечу чевнашца. Байначу беттан 29-чохь хаам хилла, полицино бехке ву аьлла, цхьа стаг дIалацарх. Читать дальше...

Шпионалла лелийна аьлла, Москох дIалаьцна Iамеркахо 2007-чу шарахь дуьйнна кест-кеста вогIуш хилла Оьрсийчу аьлла, хаамбина Washington Post хьостано. 48 шо долу Уилан Пол официалехь машенийн меженаш ечу BorgWarner компанехь болх беш хилар къаьстина газетана. Компанехь кхерамзаллан директор ву Уилан. Иштта зорбанехь дуьйцу, Уилан - хIордан пехотехь лаьттина хилар а. Шозза Иракъерчу тIеман кампанехь дакъалаьцна а ву иза, Iамеркан эскарера дIаваьккхира иза къоланаш дарна. Уилан доьзало бакъдо, цуьнан иччархошца уьйраш хилар. Читать дальше...

Кхин цкъа а вовшахтасалур ву Оьрсийчоьнан латархо Нурмагомедов Хьабиб а, ирландхо МакГрегор Конор а. UFC-н куьйгалхочо Уайт Данас бина и хаам. "2019-чу шарахь юха а и шиъ цхьанакхетар ву аьлла хета суна. Нагахь планаш хийца ца лахь, вовшахтасалур ву Нурмагомедов а, МакГрегор а", - аьлла, дIахьедина Уайта TMZ хьостане. UFC 229 турнирехь хиллачу латарх Невада штатан Атлетикан комиссино дендолчу  жамIех доьзна ду шина спортхочун тасавалар аьлла, тIетоьхна UFC-н президенто. Нурмагомедовца лата хьалхара бакъо кхача тарло Фергюсон Тонига... Читать дальше...

Байначу беттан 30-чу дийнахь Гергарчу Малхбалера цIадерзийначу берашлахь хиллера 2015-чу шарахь Оьрсийчуьра дIадигина Нальчикерчу яхархочун Налоева Мадинин беран бер. Оьрсийчоьнан берийн омбудсменан информацица, Иракъера кхин а 36 бер даймахка дерзор ду карарчу баттахь. Кху деношкахь Иракъера схьакхачийна бераш Москохарчу реабилитацин центрехь латтош ду. Лоьраша церан могушаллех талламбинчул тIаьхьа, оьшу дарба а лелийна, церан гергарчаьрга дIалур долуш ду уьш, хаамбина Нальчик гIалахь ехача Налоева Мадинас. Читать дальше...

Дахначу дийнна шерачохь Нохчийчохь цIеяьлла 386 меттиг тIечIагIбина. Оцу бохамах кIелхьарваьккхина 344 стаг. Мехкан орцан министраллан (МЧС) куьйгалло дина цу кепара дIахьедар. Къаьсттина дукха цIераш юьйлура нах бехачу секторшкахь, дукха хьолахь, газаца доьзна. "Республикехь 386-зза цIе елира.Тхан орцанхоша оцу цIерашкара 344 вахархо а, 96 миллион соьмана церан бахам а кIелхьарбаьккхина", - хаамбо орцан министраллан куьйгалхочо.

Байначу беттан 31-чу дийнахь Магнитогорскерчу тIекIелдинчу цIийнан подъезд охьахарцар а, шинаридийнахь "Газель" машенца хилла инцидент а вовшашца дозуш ду аьлла, хаамбина Znak.com гIирсо шайн хьостех пайда а оьцуш. Маркс Карлан цIарахчу урамера 164 лоьмар йолчу цIа чохь эккхийтар хилла меттиг къастийна – байначу беттан 30-чу дийнахь цхьана стага ханна лаьцна хилла и петар. Гексогенан лараш карийна цу чохь аьлла, дийцина Znak.com хьосте. "Шинаридийнахь "Газель" автомобил чохь герзаца дуьхьало йина кхо террорхо вийра. Читать дальше...

Шемара Iамеркан тIеман контингент араяккха биъ бутт гергга хан яла реза хилла Iамеркан Цхьанатоьхначу Штатийн президент Трмап Доналд. The New York Times хьостано бо и хаам, администрацерчу шайн хьосташна тIе а тевжаш. Хьалхо сенаторо-республиканхочо Грэм Линдсис дIахьедира, Шемара эскарш арадаха сих ца вала сацамбина Трампа аьлла. ХIетахь сенаторо хенаш ца йийцира. Байначу беттан 19-чохь Iамеркан президенто дIакхайкхийра, шайн пачхьалкхан тIеман ницкъ Шемара гергарчу шина баттахь арабоккхург хиларх. Читать дальше...