Новости за 10.06.2024

Бунёди кӯдакони Созмони Милал ё ЮНИСЕФ дар гузориши нави худ гуфтааст, дар 63 кишвари дунё, ки дар миёнашон Узбекистон ҳам ҳаст, кӯдакон аз камғизоӣ ранҷ мекашанд.

Нишасти севуми байнулмилалии об рӯзи 11-уми июн дар Душанбе оғоз мешавад. Мақомот гуфтанд, дар он намояндагони беш аз сад давлат ва таҳлилгарони обу иқлим аз 62 созмон ширкат мекунанд.

Раиси пешини Кумитаи амнияти миллии Қазоқистон Карим Масимов, ки бо гуноҳи хиёнат ба давлат 18 сол зиндонӣ шудааст, аз президенти ин кишвар Қосимҷомарт Тоқаев дархост кардааст, то ӯро афв кунад.

Иди Қурбон, яке аз ду ҷашни муҳими мусулмонон, имсол шоми шанбеи 15-уми июн оғоз ёфта, то 19-уми июн идома хоҳад кард. Дар арафаи ин ид бозори чорвопарвари фаластинӣ Билол Ашӯр гарм нест. Ӯ мегӯяд, ҳашт моҳи ҷанг тиҷорати ӯро дар вазъи ногувор қарор дод.

Низомиёни кишварҳои Иттиҳоди Давлатҳои Мустақил (ИДМ) ва Созмони ҳамкориҳои Шонгҳой (СҲШ) омодагиҳоро ба размоиши "Шарқ-антитеррор-2024", ки дар Узбекистон баргузор мешавад, баррасӣ карданд.

Натиҷаҳои интихоботи порлумони Аврупо рӯзи даҳуми июн маълум шуд. Ин маърака аз 6-ум то 9-уми июн дар 27 кишвари узви Иттиҳод гузашт. Ғайричашмдошт эътилофи ҳоким мавқеи худро ҳифз намудааст.

Бо пули муҳоҷирон ва шахсони хайрхоҳ дар ноҳияи Бобоҷон Ғафурови вилояти Суғд пул (купрӯк) месозанд. Он тақрибан панҷоҳ сол пеш вайрон шуда буд. Мардум мегӯянд, азбаски дар аҳди Шӯравии собиқ ва зиёда аз сӣ соли истиқлол касе ба бунёди пул иқдом накард, ночор худ даст ба кор шуданд.

Ахбори Озодӣ

Сокинони минтақаи Ғазза мегӯянд, ҷанги ҳаштмоҳа даромади онҳоро аз байн бурдаву эҳтимол зӯрашон барои харидани чорво дар Иди Қурбон нарасад.

Додситони Қирғизистон аз додгоҳ хостааст, гумонбарони "парвандаи Кампиробод" 20-солӣ аз озодӣ маҳрум ва амволашон мусодира шавад.

Вазорати иттилоот ва фарҳанги Қазоқистон 9-уми июн гуфт, пешниҳоди манъи таблиғи ҳамҷинсгароӣ дар ин кишвар теъдоди лозимии имзоҳоро барои расман баррасӣ шудани он ба даст овардааст.

Котиби давлатӣ ё вазири корҳои хориҷии Амрико тасмим гирифтааст, ки рӯзи даҳуми июн ба Мисру Исроил биравад.

Вайронгарӣ дар оромгоҳҳои насрониён дар вилояти Хатлон ва дуздидани панҷараҳои атрофи гӯрҳо мақомотро водор кардааст, ки даст ба кор шаванд. Аз ҷумла, дар шаҳри Бохтар тасмим гирифтаанд, ки атрофи оромгоҳро панҷара бигиранд, то гӯрҳои азизони мардуми масеҳӣ зери пойи гову гӯсфанд намонад.

Рустаборони Хатлон аз мавридҳои, ба гуфтаашон, вайронгарӣ дар оромгоҳҳои наздиконашон шикоят доранд. Бахусус дар ноҳияи Ёвон ва Фархор. Дар Бохтар ҳам шикоят кам нест.

​Дар натиҷаи фалокатҳои табиӣ дар соли 2023 дар Тоҷикистон 51 нафар ҷон бохта, иқтисоди кишвар тақрибан сад миллион доллар зиён дидааст.

Мақомоти ҳифзи ҳуқуқи Узбекистон дар се моҳи аввали имсол 2593 касро барои напардохтани "алимент" ба ҷавобгарӣ кашидаанд.

Додгоҳе дар Қазоқистон шаҳрванди 29-солаи Қирғизистон Алина Горшенинаро, ки ба таҳдид ё зӯроварӣ муттаҳам мешуд, бо дархости Русия ҳабс кард.

Додгоҳи вилояти Хатлон Юсуф (Ҷӯрабек) Солиҳов, машҳур ба номи "муҳофизи Хӯҷа Командир*"-ро ба гуноҳи даст доштан дар қатли 22 узви як оила ва оташ задани ҷасади онҳо ба 15 сол зиндон маҳкум кард. Ҳодиса дар Ғозималики собиқ (Хуросони ҳозира) ва дар соли 1992 рӯй додааст.

Пайвандонаш гуфтанд, бо гузашти чанд ҳафта дараки Сулаймон Ҷобировро ёфтанд. Ин муҳоҷири 43-солаи тоҷик 8-уми апрел дар шаҳри Самараи Русия ба таври мармуз "гум" шуда буд.

Миср ва Қатар таҳдид кардаанд, ки агар раҳбарони гурӯҳи "Ҳамос"* ба созиш бо Исроил розӣ нашаванд, онҳоро аз паноҳгоҳе дар шаҳри Давҳа ихроҷ мекунанд.

Раиси ҷумҳури Тоҷикистон Эмомалӣ Раҳмон дар вохӯрӣ бо аҳли маориф ва Академияи илмҳо ба танқидҳо дар бораи камбуди барқ дар кишвар вокуниш кард. Ин мулоқот 30 май дар Душанбе доир шуда, пораҳое аз суҳбати Эмомалӣ Раҳмон ахиран дар шабакаҳои иҷтимоӣ пахш шуд.

Шаҳрдори Душанбе дастур додааст, ки то 1 сентябри соли 2025 ҳамаи мошинҳои таксӣ дар пойтахт электромобил шаванд.

Додгоҳи олии Узбекистон ҳаракати мухолифи "Алға, Қарақалпоқистон"-ро созмони террористӣ эълом ва фаъолияташро дар ин кишвар манъ кард.