Новости за 17.05.2024

Иртәгә Татарстанда алмашынучан болытлы һава көтелә. Төнлә яңгыр явачак, һава температурасы +3..+8 градус фаразлана. Көндез республикада явым-төшем булмый, һава температурасы +11..+16 градуска кадәр күтәрелә. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

17 майда Мәскәүдә герой-шагыйрь Муса Җәлил исемендәге 1186нчы мәктәптә Соңгы кыңгырау яңгырады. Мәктәпне 21 укучы тәмамлый. Бу хакта Татарстанның Россиядәге Тулы вәкаләтле вәкиллеге хәбәр итә.

Петербургта Буденный исемендәге Хәрби академия территориясендә шартлау вакытында 7 хәрби хезмәткәр зыян күргән. Бу турыда РИА Новости Ленинград хәрби округына сылтама белән хәбәр итте.

Россия Федерациясе Хөкүмәте Рәисе урынбарасы Марат Хөснуллин «Россия – Ислам дөньясы» Kazan Forum 2024 форумында Фарсы култыгы илләре вәкилләре «Төньяк – Көньяк» транспорт коридоры проектын гамәлгә ашыру турында актив фикер алышканын әйтте. Бу хакта ул журналистларга пленар утырыш тәмам булганнан соң әйтте.

Татарстан Диния нәзарәте барлык дин кардәшләребезне Татарстан мөселманнары тормышындагы иң мөһим вакыйгаларның берсенә – 19 майда узачак Изге Болгар җыенына чакыра. Бу турыда Нәзарәтнең матбугат хезмәте хәбәр итте.

Самар өлкәсе Сабантуйлары графигы «Самара татарлары» сайтында чыкты.

• 1 июнь — Мәчәләй авылы;
• 1 июнь — Денис авылы;
• 1 июнь — Гали авылы;
• 2 июнь — Тольятти шәһәре;
• 8 июнь — Камышлы авылы;
• 8 июнь — Тупли авылы;
• 29 июнь — Самара шәһәре.

Казан шәһәренең Кол Шәриф мәчетендә Россия мөселманнары Диния нәзарәте җитәкчесе, Мәскәү мөфтие Әлбир хәзрәт Крганов җомга намазын үткәрде һәм вәгазь укыды. Бу хакта Россия мөселманнары Дини җыены матбугат хезмәте хәбәр итә.

«Россия – Ислам дөньясы» Kazan Forum 2024 форумында Юныс Әхмәтҗанов исемендәге яшь аш-су осталары конкурсына йомгак ясадылар, ул быел халыкара статуста уздырылды. Конкурста Ислам Хезмәттәшлеге Оешмасы илләре вәкилләре катнашты. Гран-прига Мароккодан белгеч Оадиду Редуан лаек дип табылды.

Петербургтагы бер югары уку йортында шартлау булган. Бу турыда РИА Новости үз чыганакларына сылтама белән хәбәр итте.

Татарстан мөфтие Камил хәзрәт Сәмигуллин «Россия — Ислам дөньясы: KazanForum 2024» халыкара икътисади форумының пленар утырышы ачылышында «Фәтх» («Җиңү») сүрәсенең 1-3 аятьләрен ун кыйраәт буенча укыды. Хәзрәт аятьләрне укыган вакытта утырышта катнашучыларга тәүге тапкыр бу аятьләрне Казан кулъязма Мүсхәфнең (Коръәннең) битләреннән күрсәттеләр. Бу хакта Татарстан мөселманнары Диния нәзарәте хәбәр итә.

Мария театры солисты, опера җырчысы Альбина Шаһиморатова Башкортстанның атказанган артисты булды. Бу турыда «Башинформ» хәбәр итте.

Россия Президенты Администрациясе җитәкчесе урынбасары Магомедсалам Магомедов фикеренчә, Татарстан Республикасы – дин иреген һәм шул ук вакытта халыклар бердәмлеген күздә тоткан Россия илкүләм сәясәтен гамәлгә ашыру өлкәсендә иң алдынгы төбәкләрнең берсе. Бу хакта ул «Россия – Ислам дөньясы» Kazan Forum 2024 пленар утырышында әйтте.

«Россия – Ислам дөньясы: KazanForum» халыкара икътисад форумында Татарстанның төрле районнарыннан, муниципалитетларыннан делегатлар катнашты.

Иранның тышкы эшләр министры урынбасары Али Багери әйтүенчә, Америка Кушма Штатларыннан килгән янаулар һәм Иран белән Россиягә карата кертелгән санкцияләр ике илгә дә басым ясый. Бу хакта ул «Россия — Ислам дөньясы: KazanForum 2024» Халыкара икътисади форумының пленар утырышында сөйләде.

Берләшкән Гарәп Әмирлекләренең икътисад министры урынбасары Абдулла әл-Салих Татарстан Рәисе Рөстәм Миңнехановның Россия һәм ислам дөньясы мөнәсәбәтләренә керткән өлеше турында әйтте. Бу хакта ул «Россия — Ислам дөньясы: KazanForum» халыкара икътисади форумының пленар утырышында сөйләде.

19 майда Ханты-Манси автономияле округының Салым бистәсендә «Сандугач» татар коллективының «Сабантуй» концерты була. Бу хакта Вконтакте социаль челтәрендә «Сургут татарлары милли-мәдәни мохтарияте» сәхифәсендә хәбәр ителә.

Оман Солтанлыгы икътисад министры Сәид Бен Мөхәммәд Әл-Сакри «Россия — Ислам дөньясы: KazanForum» халыкара икътисади форумының пленар утырышында катнашты. Аның фикеренчә, транспорт коридорлары төзү турында килешүләр, шул исәптән, Россиянең «Төньяк – Көньяк» коридоры – илләр арасында хезмәттәшлек һәм инвестицияләр кысаларын киңәйтергә ярдәм итә торган мөһим проектлар.

Төмән өлкәсенең Тубыл шәһәрендә Себер-татар мәдәнияте үзәгендә Халыкара гаилә көненә багышланган «Гаилә кыйммәтләре» чарасы булды. Бу хакта Вконтакте социаль челтәрендә «Себер-татар мәдәнияте үзәге» төркемендә хәбәр ителә.

Россия Хөкүмәте Рәисе урынбасары Алексей Оверчук «Россия – Ислам дөньясы» Kazan Forum 2024 пленар утырышында чыгыш ясады. Аның фикеренчә, Россиягә карата кертелгән санкцияләр, беренче чиратта, илнең икътисади үсешен тоткарлауга юнәлдерелгән. Шулай булуга карамастан, Россия куелган бурычларны нәтиҗәле үти дип саный ул.

Бүген Татарстан Республикасы Рәисе Рөстәм Миңнеханов Иран Тышкы эшләр министрының сәяси мәсьәләләр буенча урынбасары Али Багери белән очрашты. Бу турыда Татарстан җиткәчесе матбугат хезмәте хәбәр итте.

Бүген Татарстан Республикасы Рәисе Рөстәм Миңнеханов Палестина дәүләте делегациясе әгъзалары белән очрашты. Очрашу «Россия - Ислам дөньясы: KazanForum» халыкара икътисади форумы кысаларында узды. Бу турыда Татарстан җитәкчесе матбугат хезмәте хәбәр итте.

Россия Федерациясе Хөкүмәте Рәисе урынбасары Марат Хөснуллин әйтүенчә, Россиянең ислам илләре белән хезмәттәшлеге уңай нәтиҗә бирә. Бу хакта ул «Россия – Ислам дөньясы: KazanForum» икътисад форумының пленар утырышында сөйләде.

Бу көннәрдә Татарстан башкаласында уза торган «Россия - Ислам дөньясы: Kazanforum» ХV Халыкара икътисади форумы Татарстан белән Россиянең Ислам дөньясы белән диалогы үсешенә саллы өлеш кертә. Бу хакта РФ Президенты Администрациясе җитәкчесе урынбасары Магомедсалам Магомедов ТР Дәүләт Советы Рәисе һәм республика халыклары ассамблеясе җитәкчесе Фәрит Мөхәммәтшин белән очрашуда белдерде. Татарстан парламенты матбугат хезмәте шул хакта хәбәр итә.

Россия вице-премьеры Марат Хөснуллин KazanForum кысаларында Казахстан Премьер-министры урынбасары Серик Жумангарин белән очрашты. Фикер алышуда Татарстан Рәисе Рөстәм Миңнеханов катнашты. Бу хакта Татарстан җитәкчесенең матбугат хезмәте хәбәр итә.

Татарстан Республикасы Рәисе, «Россия – Ислам дөньясы» Kazan forum 2024 стратегик күзаллау төркеме рәисе Рөстәм Миңнеханов пленар утырышта ислам илләренең Россиягә теләктәшлек белдерүен әйтте.