Новости за 17.05.2024

Махсус хәрби операциядә һәлак булган хәрбиләрнең балалары булган очракта, аның гаиләсе балага 23 яшь тулганчы бер үк вакытта ике пенсия алырга мөмкин. Бу закон проекты Дәүләт Думасына кертелде. Махсус хәрби операция буенча эшче төркем җитәкчесе, Федерация Советының беренче вице-спикеры Андрей Турчак шул хакта хәбәр итә.

Самара шәһәрендә «Нур» мәдрәсәсе укучы балалар өчен ислам нигезләре һәм Коръән укырга өйрәнү буенча көндезге курслар оештыра. Анда 7 яшьтән алып 14 яшькәчә балалар чакырыла. Бу хакта «Самара татарлары» сайтында хәбәр ителә.

Казан Татарстанны «Киләчәк чәчәкләрдә» күргәзмәсендә тәкъдим итәчәк. Ул Мәскәүдә «Россия» күргәзмә-форумында 21 майдан 8 июльгә кадәр уза. Бу хакта Казан мэриясе хәбәр итә.

Татарстан Рәисе Рөстәм Миңнеханов бүген Берләшкән Гарәп Әмирлекләре (БГӘ) икътисад министры урынбасары Абдуллах ас-Салихка эшче төркем оештырырга һәм БРИКС саммитына конкрет уртак проектлар эшләргә тәкъдим итте. Очрашу Татарстан башкаласында KazanForum кырларында узды. Бу хакта республика җитәкчесенең матбугат хезмәте хәбәр итә.

Омск өлкәсе территориясендә су басу федераль дәрәҗәдәге гадәттән тыш хәл дип танылды, дип хәбәр итә «РИА Новости».

Татарстан Быел Алексеевск – Әлмәт түләүле трассасын эшләтеп җибәрергә планлаштыра. Бу хакта республика Рәисе Рөстәм Миңнеханов KazanForum кысаларында узган «Азия һәм Якын Көнчыгыш илләре аша уза торган халыкара транспорт коридорлары үсеше» сессиясендә хәбәр итте.

Красноярск крае мөфтиятендә хаҗ кылучыларны 2024 елның июнендә булачак хаҗ сәфәренә әзерләү буенча дәресләр башланды. Бу хакта Россия мөфтиләре шурасы хәбәр итә.

«Россия – Ислам дөньясы: KazanForum» икътисад форумында авыл хуҗалыгы һәм җитештерү тармагындагы хәләл индустрия буенча перспективаларга багышланган чара да үтә. Аның барышында Малайзия белән Мордовия Татарстан белән бергә эшләү нәтиҗәле булачагын билгеләде.

«21-24 май көннәрендә Казанда Мөхәммәдъяр исемендәге Халыкара төрки әдәбиятлар фестивале үтәчәк. Әлеге фестивальдә Азәрбайҗан, Казахстан, Кыргызстан, Үзбәкстан илләреннән; Башкортстан, Саха (Якут), Чувашстан, Дагстан, Кабардин-Балкар, Карачай-Черкәс Республикаларыннан әдипләр һәм нәширләр катнашачак», дип хәбәр итә ТР Мәдәният министрлыгының матбугат үзәге.

2024 елның 22 маенда Татарстан Язучылар берлеге оешуга 90 ел тулуга багышланган тантаналы кичә узачак. Бу хакта ТР Язучылар берлеге матбугат хезмәте хәбәр итә.

Татарстан Дәүләт Киңәшчесе һәм ЮНЕСКО Игелекле ихтыяр илчесе Минтимер Шәймиев бүген Бөтендөнья Ислам оешмасының (ICESCO) мәгариф, фән һәм мәдәният мәсьәләләре буенча генераль директоры Сәлим бән Мөхәммәд Әлмалик белән очрашты. ICESCO генераль директоры республикага «KazanForum»да катнашу өчен килде. Бу хакта ТР Рәисенең матбугат хезмәте хәбәр итә.

Татарстан Республикасы Рәисе Рөстәм Миңнеханов партнерлык финанслары турындагы законны камилләштерергә тәкъдим итте. Бу хакта ул KazanForum кысаларында узган партнерлык финансларына багышланган сессиядә белдерде.

Татарстан Республикасы Рәисе Рөстәм Миңнеханов республика башкаласында узучы KazanForum кысаларында DP World Әмирлекләр логистика компаниясе идарәсе рәисе һәм генераль директоры Солтан Әхмәд бән Сөләйем белән хезмәттәшлек перспективалары турында фикер алышты. Бу хакта республика җитәкчесенең матбугат хезмәте хәбәр итә.

Бүген Татарстан Дәүләт Киңәшчесе Минтимер Шәймиев Казан Кремлендә Дәүләт Эрмитажы генераль директоры Михаил Пиотровский белән очрашты. Пиотровский бу көннәрдә «Россия — Ислам дөньясы: KazanForum» халыкара икътисади форумы эшендә катнаша. Бу хакта ТР Рәисенең матбугат хезмәте хәбәр итә.

Дәүләт Думасының Саклану комитеты өч бала аталары өчен мобилизацияләүдән кичектерү турындагы закон проектын кире кагу яклы. Документ Думаның электрон базасында барлыкка килде.

Майның киләсе декадасында Татарстанда температура нормадан 3 градуска түбәнрәк булыр дип көтелә. Әмма көндез термометр баганалары +15..+20 градуска җитәчәк. КФУның метеорология һәм табигатьтән файдалану кафедрасы доценты Тимур Әуһәдиев язның өченче аеның икенче яртысына шундый фараз ясады, дип яза «Челнинские известия».

РФ массакүләм мәгълүмат чаралары хезмәткәрләренә Париж олимпиадасында ил символикасын куллану тыелачак. Халыкара олимпия комитеты (МОК) мәгълүматлары буенча, медиа хезмәткәрләренә нейтраль спортчыларга карата булган кебек үк таләпләр куелачак. Бу хакта ТАСС яза.

Татарстан шефлык итә торган Лисичанск шәһәренә Буадан гуманитар йөк илтеп тапшырылды. Яшелчәләр һәм шәһәр халкына кирәкле корыч торбалар инде бушатылган, киләсе бурыч – махсус операциядә катнашучыларга автомобильләр һәм посылкалар китерү.

Татарстан Республикасы вице-премьеры – Татарстан Республикасының Россия Федерациясендәге тулы вәкаләтле вәкиле Равил Әхмәтшин Харбинда Татарстан делегациясен җитәкли. Биредә VIII Россия-Кытай ЭКСПОсы уза. Бу хакта Татарстанның Тулы Вәкаләтле Вәкиллеге Телеграм-каналында хәбәр итәләр.

Казан федераль университетының «Дилүс улы» командасына 50 мең сум тапшырылды.

Күренекле татар язучысы Шәриф Камал хикәяләре Казанның MOÑ театр мәйданчыгында яңа яңгыраш алды. Биредә язучының әсәре исеме белән «Матур туганда» дип аталган искә алу кичәсе узды.

14-19 майда Казанда «Россия – Ислам дөньясы: KazanForum» икътисад форумы кысаларында халыкара мөнәсәбәтләргә, илләр хезмәттәшлегенә багышланган чаралар үтә. Әлеге вакытта «Казан Экспо»да Ислам хезммәттәшлеге оешмасының 55 еллыгы уңаеннан Россия белән бу оешма илләренең күпкырлы хезмәттәшлегенә багышланган матбугат очрашуы үткәрелә.

Россиядә проектлар гамәлгә ашыручы Кытай инвесторлары икътисади ташламалар һәм технологик базадан файдалану мөмкинлегенә өмет итә ала. Бу хакта РФ Президенты Владимир Путин Харбинда VIII Россия-Кытай ЭКСПОсын һәм IV Россия-Кытай төбәкара хезмәттәшлек форумын ачу тантанасында чыгыш ясаганда белдерде.

«KazanForum»ның чираттагы көнен Татарстан Рәисе Рөстәм Миңнеханов очрашудан башлады. Бу юлы ул Ислам хезмәттәшлеге оешмасы делегациясе белән аралашты, дип хәбәр итә ТР Рәисенең матбугат хезмәте җитәкчесе Лилия Галимова.

Майның икенче атнасында Татарстанда кыяр һәм помидор бәясе арзанайды. Беренчеләренең бәясе 6,64 процентка, яки килограммы өчен 10 сумга диярлек кимеде, икенчеләренеке – 2,42 процентка, яки 5 сумнан артыкка. Статистика белән Татарстанстат уртаклашты.