Новости за 31.05.2019

Во фокусот на годинашниот Светски ден без тутун е „здравјето на белите дробови и тутунот“. Кампањата, како што наведуваат во Светската здравствена организација, ќе ја зголеми свеста за: негативното влијание што го има тутунот врз здравјето на белите дробови. Кампањата, исто така, служи како повик за акција, застапувајќи се за ефективни политики за намалување на потрошувачката на тутун и ангажирање на заинтересираните страни во повеќе сектори во борбата за контрола на тутунот.

Американскиот претседател Доналд Трамп воведе царини од пет насто за целата мексиканска стока како вид на притисок врз Мексико да направи нешто повеќе во сузбивањето на бранот мигранти од Централна Америка кои сакаат да стигнат во САД. Царините ќе стапат во сила на 10 јуни, а Трамп рече дека тие постепено ќе растат се додека „не биде решен проблемот со илегалната миграција“.

Припадници на белградската полиција спречиле синоќа поголема група хулигани да упаднат на фестивалот „Мердита – добар ден“ на кој на белградската публика и се претставуваат современи уметници од Косово, јавува Радио Слободна Европа, повикувајќи се на полициски извори. Станува збор за припадници на навивачки групи кои носеле транспаренти со знамето на Косово преку кое било грбот на Србија и натпис „Нема предавање“, а скандирале и погрдни пароли против Албанците. Фестивалот беше отворен во средата.

Унгарската полиција соопшти дека го привела капетанот на бродот кој учествувал во сударот со туристичкото бротче на Дунав во Будимпешта при што седум јужнокорејски туристи загинале, а дваесетина се водат за исчезнати. „Капетанот на бродот е сослушан како осомничено лице. По сосолушувањето 64 годишниот капетан од Одеса е префрлен во притвор“, се наведува со соопштението на полицијата. Бродот за седум секунди потона во средата во центарот на Будимпешта кај зградата на унгарскиот парламент.

Папата Франциск денеска ја почнува тридневната посета на Романија во рамките на неговите напори да ги зацврсти врските меѓу православните и катoличките верници. Околу 5 проценти од 20 милиони жители на Романија се католици. Поглаварот на Римокатоличката црква во почетокот на мај ги посети Северна Македонија и Бугарија. Папата Франциск изрази надеж дека овие посети ќе ги зајакнат врските меѓу православната и католичката црква кои се разделени од 1054 година.

Ќе биде променливо облачно и нестабилно со локален пороен дожд и грмежи, особено попладне кога на места процесите ќе бидат поинтензивни во форма на невреме со засилен ветер и појава на град. Утринската температура ќе биде од 8 до 15, а дневната од 14 до 27 степени. Во Скопје и околината слично време. Утринската температура ќе биде околу 13, а дневната ќе достигне до 23 степени.