Коронавирусах дуьнентIехь велла 800, 22 шо долчу Кадыровн невцах воккха хьаькам вина, Нохчийчу схьавалийна 50 «наркоман», Кавказ къовлалуш ю вирусах (Керланаш кечдеш иллюстрацина пайдаоьцу Маршо Радион архивех а, официалан сайташкарчу материалех а).
Эцархойх яьхна ю Соьлжа-ГIалара кхача бухку туьканаш. Юучух хIусамаш юзуш хьийза нах. Оцу юкъанна, «коронавирус Нохчийчу кхочур а яц», аьлла Кадыровс.
ДуьнентIера массо маьждигаш, килсаш, синагогаш, кхечу динийн хIусамаш ю дIакъовлуш, нах коронавирусах ларбархьама. Цхьа хьал ду Израилехь а, ХIиндойчохь а, Чехехь а, Туркойчохь а, массанхьа а. Оьрсийн Ортодоксан Килсо а баржийна ун даржарца доьзна патриарха арахецна хьехам.
