Новости за 26.12.2017

Оьрсийчоьнан Федерацин кхеташонан декъашхочо Сабсаби Зияда хаам бина, БагIдадерчу цхьана набахтехь Оьрсийчуьра ши йоI карийна шайна аьлла. И шиъ "Исламан пачхьалкхо" Iуналла дечу территори тIе дIайигина хилла церан дай-наноша. Цунах лаьцна хаам бина «РИА Новости» агенталло. Сабсабис дийцарехь, ХIинжа-гIалара а, Тюменера а ши йоI латтош хилла зударийн набахтехь. Нохчийчоьнан куьйгалхо Кадыров Рамзан юкъагIортар бахьана долуш аьтто баьлла кхеле и шиъ цIаерзо оьшуш болу сацам байта. Дийцарехь, цу шинан дай-наной кхелхина. Читать дальше...

Оьрсийчоьнан коьртачу харжамийн комиссино магийна телевизионан белхахочунна Собчак Ксенияна президентан харжамашкахь дакъалаца. Цунах лаьцна хаам бина Собчакан сайта тIехь. Иза хьалхатеттинарг ю "Гражданская инициатива" парти. ХIинца Собчак декхарелахь ю 100 эзар стеган куьйгаш гулдан. Цул тIаьхьа иза официалан кепара хир ю 2018-чу шарахь хир болчу харжамашкахь президентан дарж къовса бакъо йолу кандидат.

Нохчийчуьра кхелхина баьхкинчу мухIажирийн хьашташ кхочуш дан леррина пачхьалкхан комисси кхуллур ю хIара бутт чекхбалале ГIалгIайчоьнан Iедало.   ТIемаш бахьана долуш Нохчийчуьра дIабахана ГIалгIайчохь баха хевшинчу нехан коьрта проблемаш дIайохур ю гергарчу хенахь, хаам бо ТАСС агенталло, ГIалгIайчоьнан куьйгалхочуьнан зорбанан сервисана тIе а тевжаш. ГIалгIайн Iедало далочу терахьашца, Нохчийчуьра мухIажирашна хьажийна 1439 петар йина республикехь.

Полицино бинчу хаамца, нохчийн къомах волу пхи жима стаг, кафехь хIума кхоллуш болчу нахаца дов а даьккхина, царех летта. ТIелатархойх цхьаммо урс даьккхина а хилла. Тешаша кхайкхина полисхой схьакхаьчча, царах а летта 18 шарера 21 шаре кхаччалца хенаш йолу кегийрхой. Цхьа полисхо лоьрийн цIийне кхачийна. Зуламхой лецна. Маршо Радио-н корреспонденте Венерчу полицин прессица болх баран декъехь бинчу хаамца, Iедалхошна дуьхьало ярна а, полисхойх латарна а бехктакхаман гIуллакхаш схьадиллина царна дуьхьал.

Британерчу The Beatles тобан ватанчана Старр Рингона лур ю къонахчун титул. Цунах лаьцна хаам бина The Sun газето, музыкантан доттагIчунна тIе а тевжаш.    Газето дийцарехь, цунах лаьцна хаам кхаьчна Старрга паччахьан Букингем хIусамера ши-кхо кIира хьала. Цунна титул лур ю Паччахьо Элизабен ШолгIачо музыкехь а, сагIадаккхарехь а доккха дакъалацарна. The Beatles декъашхошна Британин империн орденаш елира 1965-чу шарахь. 100 шо хьалха и орден кхоьллинарг вара Элизабет ШолгIачуьнан деда паччахь Георг V. Читать дальше...

ГIирмерчу гIезалойн хIусамашкахь цIийнах хьоьжуш бу ницкъаллин структурийн белхахой. Цара дийцарехь, талламаш боьзна бу Алуштара газан биргIа эккхийтарца. Иза иштта делахь а, таллам беш бу школехь психолог болх бечу Мисиратова Асенен а, цуьнан марненан а хIусамашкахь.   Алуштахь газан биргIана уллехь эккхийтар динера Лахьан-беттан 1-чу дийнахь. Цхьана ханна газ а йоцуш виснера 1500 гергга стаг. Цул сов, галбаьккхинера лаккхара ницкъ болчу тоькан ши богIум. ФСБ-но дIакхайкхийна, иза диверси яра аьлла. Читать дальше...

ПIаьнгазахь Iуьллучу Дуиси а, Омало а ярташкахь леррина операци дIаяьхьна Губржийчоьнан пачхьалкхан кхерамазаллин сервисо. ДIалаьцна меттигера 3 вахархо. Цунах лаьцна хаам бина гуьржийн телеканалаша. Цара дийцарехь, леррина операци хилла тахана, ГIура-беттан 26-чу дийнахь, сатоссуш. Иза дIахьош дакъалаьцна ницкъаш хIинцале а дIабахана цу чIожера. "Новости-Грузия" хьастано дийцарехь, Дуисехь а, Омалохь а хIусамашкахь таллам бина эскархоша. Омалохь цхьаьна вахархочуьнан цIа чохь карийна герз. Болчу хаамашца... Читать дальше...

Оьрсийчуьрчу президентан харжамашкахь дакъалаца дагахь ю Дагестанан муфтин зуда Гамзатова Iайнаъ. Цунах лаьцна хаам бина "Кавказ.Реалиино". Цу портало дийцарехь, Гамзатован векло Гиравов Шаха хаам бина, Оьрсийчоьнан коьртачу харжамийн комиссе цуьнан цIарах кехат дIаделла шаьш аьлла. Гиравовс дийцарехь, ГIура-беттан 30-чу дийнахь ХIинжа-гIалахь харжамхойн гулам хир бу, Гамзатована гIортор еш. Гамзатова (ПIетIмат) Iайнаъ хIусамнана ю меттигерчу муфтин Абдуллаев Ахьмад-Хьаьжин. Цо Iуналла деш ду республикера динца доьзна зорбанан сурсаташ. Читать дальше...

МаслаIатан цхьаьнакхетарехь дакъалаьцначу Оьрсийчуьрчу патриархо Кирилла хаам бина, Донбассехь йийсаре лецна нах хийца барт бина шина агIоно аьлла. Цунах лаьцна хаам бо ТАСС агенталло. Патриархо дийцарехь, хуьйцур болчу нехан цIейозана юкъа ца бахана берриг а йийсарехь болу нах. Цу дийцаршкахь дакъалоцуш хиллачу ДНР олучу сепаратистийн тобанан хьалханчо Захарченко Александра хаам бина, йийсарехь болу нах хуьйцур бу шаьш ГIура-беттан 27-чу дийнахь аьлла. Беларусерчу Минскехь 2015-чу шарахь Чиллан-беттан... Читать дальше...