Новости за 12.10.2019

Элиста гIалин кхело пIераскана 20 эзар сом гIуда тоьхна меттигерчу жигархочунна, журналистна Бюрчиев Бадминна. Иза бехкево шайн мехкан шахьаран коьрте «Донецкан республикерчу» сепаратистийн могIаршкахь лелла стаг хIоттор емалдарна. Ши кIира ду Элистахь кеп-кепара протестан акцеш лаьтта. Гуламхоша а, пикетчикаша а харцо лору Элистан куьйгалле «ДНР-хо» Трапезников Дмитрий ваийтар. Байначу беттан 29-чу дийнахь резадацар кхайкхочу гуламхойн коьртехь хилла лору Бюрчиев. Журналиста харцдо ша протест айинарг ву бахар. Читать дальше...

Махкахь лаьттах пайдаоьцурш зуьйш, Дагестанан прокуратуро Iорадаьккхина ХIинжа-ГIалин Ленинан кIоштарчу шина вахархочо, харц кехаташ а кечдеш (шахьаран администрацин сацамаш), кадастре а язлуш, шайн дола 17 беш яккхар. Дерриг а доладерзийна латта ду 7650 квадрат-метр. Бозбуанчаллица 13 миллион соьманна зулам дина оцу шимма, элира прокуратурин векалша "Каквказ.Реалиига". Цара бахарехь, итт-итт шераш тоха тарло цIе ца йовзийтинчу шинна, нагахь санна бехк царна тIехь бисахь.

Оьрсийчоьнан Пачхьалкхан Думин "ВКонтакте" машин агIонтехь хаттар дара хIоттийна, меттахIотто дезий Оьрсийчохь кхелашкахула бер дийна стаг а, педофил а вен кхачор, аьлла. 80% бахархошна хетарехь, кхелашна байа кхачон магадайта деза педофилаш а, бераш дойурш а. Амма 16% наха мегар дац, аьлла, пачхьалкханна стаг цхьана а бахьаница вен. Деношкахь Саратовхь 9 шо долу Киселева Лиза йийна стаг лецира. ОьгIазбахначу бахархойн карара, ца воьйтуш, халла ваьккхира иза полицино. Оцу зуламан лорах ду Пачхьалкхан Думехь стаг вен кхачор дийцаре даккхар.

Нохчийчуьрчу Теркйисте боьдучу новкъахь, Горагорск юьртанна дехьа, Долинское юртанна гергахь вовшахкхетта ши такси-машен, хаамбо Маршо Радион хьостанаша. Оцу некъахьовзамехь делла ши адам. Царех цхьана машена чохь велларг ву Элин-Юьртара Датиев Халид, шолг1ачу машена чохь еллачу зудчуьн цIе билгал ца яьлла Маршо Радиона. Пхи стаг лазийна, дарбанцIийне виллина. Бохам толлуш ю полици.

ХIинжа-ГIалина чуйогIучу Албурикентехь маьждига чу а ваьлла, оцу чуьра сагIаийна ахча гулдан хIоттийна ботт яста воьлла хилла ши жима стаг, амма гучуваьлла хехочунна, дийцира "Кавказ.Реалиига" Дагестанан полицин векалша. Сеталца [screwdriver – инг., отвертка – оьрс. - ред] ботт елла гIерташ лаьцна ши кIант. Ткъа хехо, ца водуьйтуш, шаьшшиъ сацо гIоьртича, сеталца дуьхьалойина. Хехочух тийсабелла уьш, амма вукхо травматикан тапчанца цхьанна яйн чов йина. "Чов йоккха яц, иза лоьрашна тIевигина. Читать дальше...