Новости за 09.05.2018

Оьрсийчоьнан Федерацин кхеташонан конституцица доьзначу низамашкахула а, пачхьалкхан кеп хIотторехула а комитетан декъашхочунна Нарусова Людмилина оьшуш дац аьлла хета, Нохчийчоьнан парламенто Конституцина тIехь хийцамаш бар хьокъехь дуьйцург. Цо билгалдаккхарехь, Нохчийчуьрчу парламенто кечйина Оьрсийчоьнан президентан даржехь йокккху хан яхъярца доьзначу низаман проект кечъяр догIуш доцу хIума а ду, иза хьажийначу стеган амаошца догIуш доцуш а ду. Нохчийчуьрчу депутаташа кховдийнарг ду цхьана стеган бакъо хила еза... Читать дальше...

Iамеркан президенто Трамп Доналда дIахьедар дина кхаарин дийнахь, Къилбаседа Корейхь лаьцна хилла кхо Iамеркахо цIа вогIуш ву Пхеньянехь визитаца хиллачу пачхьалкхан секретарца Помпео Майкаца аьлла. Кхуьа а, хетарехь, могуш-маьрша ву, яздина Трампа Twitter-хь.

ХIора шарахь, хIора гIалахь санна, тIеман парад дIаяьхьна Нохчийчоьнан куьйгалло Соьлж-ГIалахь. Гайтаме яьккхинера тIеман ницкъаш а, царна тешийна техника а. Декъаозийнера бераш, кегийрхой, къаной, бюджетан белхахой а.

Нохчийчоьнан куьйгалхочунна Кадыров Рамзанна "Даймехкан Турпалхо" орден елла меттигерчу парламентан спикеро Даудов Мохьмада. Цунах лаьцна хаам бина РИА Новости агенталло. Парламентехь бинчу хаамца, и орден кхоьллина депутаташа кхушеран Зазадоккхучу-беттан 1-чу дийнахь. Нохчийчоьнан куьйгалхо дуьххьарлера стаг ву парламенто иза елларг

Ильина Мария, Сибирь.Реалии Деношкахь Омскерчу №7 набахтера мукъаваьллачу Сулейманов Руслана дийцира "Чохь йоллу Русь" юкъараллерчу адвокате Гончарова Верига ша муха хьийзийра набахтин белхахоша. Дукха бу оцу набахтех лаьцна тоьшаллаш дийраш. 2016-чу шарахь Омкерчу №7 набахте валийра адвокато Гончарова Верас 1уналла ден Павел Ф.. Цуьнан тайпан цIе ца йоккху юристо ("иза кхин а чохь валла дезаш ву"). Набахти вон юьйцуш юйла хуучу Гончаровас цига хьалххе дахьийтира массех кехат – "и стаг дуьнено вицвина воцийла хаийта". Читать дальше...

Дагестанерчу Агачаул эвлан йистехь вавшахкхетта кхо машен, яздо Кавказ.Реалиино. И бахьана долуш виъ стаг вийна, шайна юкъахь цхьа бер а долуш, хаам бина республикан могушаллан министралло. Цу некъахьовзамехь лазийна ву кхин а 5 стаг. Уьш охьабехкина дарбанан хIусамашка.

Москох кхаарин дийнахь полисхоша лаьцна, Толаман де даздечу акцехь дакъалоцуш хилла "Аьррохьара блок" боламан 23 декъашхо. Цу боламан Telegram-каналехь бинчу хаамца, цаьргахь плакат хилла "Это не их победа" (Иза цера толам бац) яздина плакат. Цу тIехь виллина хилла Путин Владимир а, Медведев Дмитрий а, ницкъаллин структурийн белхахой а, ткъа иштта нацистийн Германица юкъаметтигаш лелийна инарла Власов Андрей а.

Богучу Килауэа ломара охьаьвддачу маьIданаша хIаллакъеш ю машенаш, цIенош, дитташ. Бохам гойтуш видео яржийна Гавайи-гIайренан бахархоша. Ломана 20 километр герга лаьттачу Леилани-Эстейтс юьртарчу 2000 вахархочун вада дезна. Яьгна 35 гIишло, беллачех лаьцна хаам бац цкъачунна. (Reuters-ан видео)

Толаман де даздеш мероприятеш дIахьош ю Оьрсийчохь. Москох хилла тIеман парад. Цига хьаша санна веана вара Израилан премьер-министр Нетаньяху Биньямин а, Сербин президент Вучич Александр а. Толаман де дезде а, мукъа де а ду Оьрсийчохь. 1945-чу шарахь Москох буса сахьт даьлча Стигалкъекъа-беттан 9-чу дийнахь Германино капитуляцин акт тIеийцира Берлинехь. Цу кепара чекхбелира Европехь ШолгIа Дьуненера тIом. ТIаьххьара болчу хаамашца, цу тIамехь 50 сов миллион адам дийна. Царна юкъахь ву 27 миллион Советан пачхьалкхан махкахо. Читать дальше...

Шемахь Ярмук олучу Палестинера мухIажираш дIатарбинчу меттигера дийнахь-бусий шайн доьлашца цхьаьна араваьлла 1200 тIемало. Цунах лаьцна хаам бина Оьрсийчоьнан инарло Евтушенко Юрийс. Цо дийцарехь, автобусашца и нах дIабигна Алеппо провинцин къилбаседехьарчу эвланашка. Цул сов, цхьаболчу хаамашца, оппозицин тобанийн тIемалой арабовлуш бу "ХIомс" олучу гуманитаран коридор кхоьллинчу зонера а. Цу Iалашонца цигахь Эр-Растан эвлан йистехь болх беш ю нах, таллам а беш, чекхбовлуьйту пункт. Цу пунктехула... Читать дальше...

ПетарбургIан кхело хан тоьхнарг ю 30 шо долу меттигера яхархо Федорова Надежда, хаам бо 1tv.ru сайто. Стохка Гезгмашин-баттахь цо гайх мийра тоьхнера кхо шо долчу жимачу кIантана. 34 шо долу Худайкулова Барно хилла берийн майданехь шен кIант ловзийта араяьлла. Оццу меттехь жIаьала доладалийта араяьлла Федорова. Худайкуловас жIаьла даIадаккхар дехка цуьнга бераш ловзучу майданера, шен могуш воцу кIант иммунитетца халонаш хьоьгуш ву аьлла. Жоп луш Федоровас цкъа дуьххьара нанна а тоьхна, юха тIекхоссаелла гайх мийра тоьхна жимачу берана. Читать дальше...

Москох Пресненски кIоштан кхело шинарин дийнахь юха а яхйина Нохчийчоьнан куьйгалхочуьнан Кадыров Рамзанан Украинехь векал хиллачу Цицулаев Рамзана чохь йоккху хан. Цунах лаьцна хаам бина РИА Новости агенталло, кхелан зорбанан секретаро Черников Алексейс аьллачунна тIе а тевжаш. Цицулаев талламан изоляторехь латтор ву Марсхьокху-беттан 11-гIа де тIекхаччалц. Иза бехке веш ву 4 зулам деш дакъалацарна. Царна юкъахь ду Iедалан векална ницкъ бар а, бозбунчалла лелор а, адам лачкъор а, ницкъ а беш, ахча даккха гIортар а. Читать дальше...

Нохчийчуьрчу парламенто кечйина Оьрсийчоьнан президентан даржехь йокккху хан яхъярца доьзначу низаман проект. Гергарчу кхеташонехь иза Пачхьалкхан Думе кховдорах лаьцна сацам тIеоьцур бу меттигерчу депутаташа.    Цара кховдийнарг ду цхьана стеган бакъо хила еза, юкъах а ца волуш, кхузза президент хила аьлла, Конституцина тIехь хийцам бар. Иза хир ду кхана, Стигалкъекъа-беттан 10-чу дийнахь. Оханан-беттан 13-чу дийнахь Нохчийчоьнан куьйгалхочо Кадыров Рамзана дIахьедар дира, Путин Владимир президентан даржехь кхин дIа а вита веза аьлла. Читать дальше...