Новости за 27.02.2019

Къилбаседа ХIирийчуьрчу "Бесланан наной" зударийн юкъаралло дехар дина Оьрсийчоьнан чоьхьарчу гIуллакхийн министре Колокольцев Владимире, шайн республикан а, ГIалгIайчоьнан а дозанехь лаьтта полицин пост йитахьара аьлла. Цунах лаьцна яздо "Кавказ.Реалиино". Зударий эргIадбахана бу социалан машанашкахь дискусси яржарна, Нохчийчоьнан куьйгалхочо Кадыров Рамзана Къилбаседа Кавказехь ерриг а блок-посташ дIаяха еза алар бахьана долуш. "Бесланан наной" тобанан хьалханчо Дудиева Сусаннас дийцарехь,... Читать дальше...

Бакъо а йоцуш Нохчийчохь вехаш хилла 78 кхечу пачхьалкхан вахархо махкахваьккхина 2018-чу шарахь. Цунах лаьцна хаам бина Оьрсийчоьнан федералан суьдан пурстоьпийн сервисан Нохчийчуьрчу урхаллан куьйгалхочо Алаудинов Iабдула. Цо дийцарехь, Нохчийчуьра дIахьовсийначу нахана бехке диллинарг ду миграцин низам дохор. Алаудиновс куьйгалла дечу урхалло Чиллан-бутт болалуш хаам бира,  Куршлойн а, Теркайистан а кIошташкахь талламаш беш кхушара Узбекистанера 3 вахархо лаьцна Нохчийчоьнан ницкъаллин структурийн белхахоша аьлла. Читать дальше...

Оьрсийчохь алсамбевлла махкахь коррупци шуьйра яьржина халаро сагатдойтучу нах. 2016-чу шарахь дуьйна шозза тIекхетта цу тайпа ойла йолчу адамийн терахь. Карарчу хенахь 41 процент Оьрсийчуьра бахархой бу синтембайна пачхьалкхехь кооррупци шуьйра яьржина хиларна. Оццул лакхара хилла дацара и терахь 2005-чу шарахь дуьйна, хаам бо "Левада-центро". Цо бинчу талламца, махкахь уггаре а ира проблема хета нахана мехаш дестар – 62%. Ткъа 44% бахархойн сагаттадийриг ду къоьлла а, адам къийдалар а.

Кашмирехь "Джаиш-е-Мухьаммад" тIемалойн тобанна бомбанаш йиттина аьлла Индино бина хаам харцбина Пакистано. Цунах лаьцна дIахьедар дина Пакистанан премьер-министро Хан Iимрана, хаамбо Reuters агенталло. Iедалан куьйгалхочо дийцарехь, ракеташ тоьхна Балакот гIалана гергарчу хьунха. "Цара цхьа а зе ца дина", - аьлла Хана. Шинарин дийнахь зорбанан гIирсаша хаам бира "Мираж-2000" олу Индин 12 кемано, 1000 кила еза бомбанаш а тоьхна, хIаллакъйина Пакистанан террритори тIехь йолу тIеман тобанийн лагерш аьлла. Читать дальше...

Дагестанан муфтиято дехар дина Делах тешачу нахана хетарг лоруш спектаклаш гойтуш, республикехь лелачу оьздангаллан барамашца а догIуш цензура юккхахьара аьлла. Цунах лаьцна хаам бина муфтиятан декъашхочо Атаев Зайнуллас шен Instagram-хь, яздо Кавказ.Реалиино. Диндайн реза цахилар гIаттийнарг ду ХIинжа-ГIаларчу тетатрехь Чиллан-беттан 23-чохь эвхьаза сценаш йолу "Божарий таллар" пьеса гайтар. Шинарин дийнахь и пьеса хIоттийначу актеро Жидков Ивана бехк цабиллар дийхира Дагестанехь иза гайтарна... Читать дальше...

Кхеле озийнарг ю Соьлж-ГIалара яхархо У. Хьава. Цунна бехке диллинарг дара хьарамлонца ахча даккхар. Талламхойн версица, 2017-чу шарахь "Къона доьзал" программа кхочуш еш ахча эца аьтто бийр бу ша аьлла шина зудчуьнгара эцна хилла цо цхьангара 58 эзар сом, вукхуьнгара 20 эзар сом. Соьлж-ГIаларчу Октябран кIоштан кхело бехке лаьрра иза хьарамло лелорна. У. Хьаван жима ши бер хилар а, цо ахча юхадерзийна хилар а тидаме эцна арахь яьккха 1 шо 6 бутт хан кхайкхийна цунна. Кхелан сацам болх бан болабелла.

Къилбаседан Кавказан тIеман гонан суьдехь дIадирзина ГIалгIайчуьрчу вахархочун Хашагульгов ЯкIубан бехктакхаман гIуллакх къастор. Шинарийн дийнахь хиллачу суьдан кхеташонехь тIаьххьара дош олуш тIемло хиларна а, терроран тIелетаршкахь дакъалацарна а бехке веш волчу цо дIахьедар дира, шен цхьа а бехк цахиларх лаьцна. Хашагульгов лаьцнера Iедалша 2013-чу шарахь Чиллан-беттан 8-чу дийнахь Яндарехь. Цунна бехке дуьллуш дара "Вилайат ГIалгIайчоь" шех олучу тIемалойн тобанан декъашхо хилар а, маситта тIерроран тIелатар дарна а... Читать дальше...

Муьлш бу ца хуучу наха Оьрсийчуьра бер лачкIийна Шемахь "Эль-Хол" мухIажирийн четаран гIалара. Цунах лаьцна хаам бо РИА Новости агенталло, Нохчийчуьрчу бакъонашларъярхочунна Саратова Хедина тIе а тевжаш. Хьалхо социалан машанашкахь видео гучуелира, муьлш бу ца хуучу божарша Iаьрбийн маттахь хьарса месаш йолчу кIанте хаттарш деш гойтуш. Беро царна доцца жоьпаш лора Iаьрбийн маттахь, тIаккха оьрсийн маттахь элира "шен ненайиша йолчу ваха лууш ву" ша аьлла. Цуьнца цхьана видеороликана кIеллахь яздина ду цуьнан да нохчи ву аьлла. Читать дальше...