Новости за 21.07.2018

Нохчийчуьрчу Бороздиновская эвлара вахархо Курбаналиев Курбан бехке веш ву Ойсхарара яхархо Шемарчу тIемалойх дIатоха дагахь хилла аьлла шеко йолуш. Ткъа цуьнан ши юьртахо лаьцна цо зулам кечдеш хилар хьокъехь Iедалшка хаам ца барна. Меттигерчу телеканалехь шайн бехк хилар даре дина цара, амма цу нехан гергарчара иза бакъ дац боху, яздо "Кавказский узело". Болчу хаамца, Бороздиновская юьртара 6 стаг лаьцнера ницкъаллин структурийн белхахоша кху беттан 12-чу дийнахь. Уьш лацаран ца хаьа шайна, бохура гергарчара. Читать дальше...

Шемара мухIажираш шайн махка цIаберзош цхьаьна болх бар хьокъехь кехат хьажийна шаьш Цхьаьнатоьхначу Штаташка аьлла, дIахьедар дина Оьрсийчоьнан тIеман министралло. Инарло Мизинцев Михаила дийцарехь, иза доьзна ду Оьрсийчоьнан а, Iамеркан а президентийн ХIелсинкехь Товбеца-беттан 16-чохь хиллачу цхьаьнакхетарехь цу хаттарехь барт хилла хиларца. Оьрсийчоьнан тIеман министраллан векалша чIагIдарехь, дуьйцург ду Урданехь а, Ливанехь а, Туркойчохь а, Европерчу пачхьалкхашкахь болу мухIажираш цIарберзор хьокъехь план хIоттор. Читать дальше...

ПIаьнгазарчу бахархоша Дуисехь дуьхьалонан акци дIаяхьна, шайн чIожехь ток йоккху станцеш яхкар сацо гIерташ. Керла гидроэлекторостанцеш яхкаро цигарчу экологина а, юьртабахамна а, туризм кхиарна а зе дийр ду аьлла хета царна. "Кавказский узело" бинчу хаамца, ПIаьнгазан чIожехь Хадори ГЭС олу хаьлхара станци йиллира Китайн пачхьалкхан Малхбален-Сычуанан компанино 2004 шарахь. Кхин а  3 станци йилла планаш ю Гуьржийчоьнан Iедалан ПIаьнгазахь.   2005-чу шарахь Ходорерчу станцехь инцидент хиллера, меттигерчу нохчаша дакъа а лоцуш. Читать дальше...

Ток йоцуш биса мегаш бу цуьнах шен хеннахь ахча дIа ца делла Гуьмсан кIоштара бIеннаш бахархой. Царна тIехь долу декхар ду 13 миллион сом, хаам бо "Вести Кавказа" сайто. Цо яздарехь, бахархошна ток юхкучу "Чеченэнерго" компанино хIинцале а тоьках дIахадо сацам бина 1030 декхархо.

ГIезалойчоьнан куьйгалхочо Минниханов Рустама Оьрсийчоьнан президенте Путин Владимире хьахийна, стадионашкахь йий дохкар юха а юкъадаккхар хьокъехь ойла яхьара аьлла. Миннихановна хетарехь, и гIуллакх "православин вешарех" гIагIа бар хир дара. Цунах лаьцна ГIезалойчоьнан куьйгалхочо дIахьедар дина пIераскан дийнахь, спортехула йолчу комитетан а, "Россия - 2018" кхеташо вовшахтохаран комитетан а кхеташонехь. ТАСС агенталло бинчу хаамца, Миннихановс хаам бина футболан дуьненан чемпионат йоьдуш... Читать дальше...

Дагестанехь пIераскан дийнахь машенахь хилла ши полисхо вийна, муьлш бу ца хуучу наха герз а диттина. Кхин цхьаъ чов хилла ву. И хаам бакъбина республикан чоьхьарчу гIуллакхийн министралло. ТIелатар дина Кизил-юьртан кIоштахь "Кавказ" некъа тIехь. Герз диттина полисхошна машенна чуьра. ТIелетар динарш къайлабевлла. Оьрсийчуьрчу хаамийн агенталлаша яздо, полицин белхахой байинарш Хасав-юьртара тIеман тобанера нах бу бохуш. Оццу хенахь интернетехь хаамаш баьржина иза "Исламан пачхьалкх" шех олучу тобано шена тIеэцна хиларх лаьцна. Читать дальше...

2019-чу шарахь хир долу мукъа денош дехьа-сехьа дохуш проект кечйина Оьрсийчуьрчу белхан министралло. Иштта Дечкен-баттахь (Январь) 5-чохь а, 6-чохь а хила деза мукъа денош (шот а, кIиранде а) дехьадохур ду Стигалкъекъа-беттан (Май) 2-чу а, 3-чу деношка. Чиллан-беттан (Февраль) 23-гIа шотде хиларна, цу дийнахь хила деза мукъа де дехьадоккхур ду Стигалкъекъа-беттан 10-чу дийне. Цу кепара, Оьрсийчуьрчу бахархоша садоIур ду Дечкен-беттан 30-чу дийнахь дуьйна Дечкен-беттан 8-чу дийне кхаччалц а, Чиллан-беттан 23-чу а... Читать дальше...

Украинин Лаккхарчу Радан хьалхарчу вице-спикеро Геращенко Иринас юхатоьхна Украинин малхбалехь муьлхха а референдум яр. Шен Фейсбукерчу агIонехь цо яздина, цхьа а референдумаш хир яц, тIе хьажийна масатоьпаш а йолуш, школашна а, берийн бешашна а гонаха хIиттийна Оьрсийчоьнан танкаш а йолуш, аьлла. ПIераскан дийнахь Оьрсийчоьнан президенто Путин Владимира ХIелсинкехь кху беттан 16-чохь Iамеркан президенте Трамп Доналде аьлла хилла Донецкан а, Луганскан а халкъан олучу республикашкахь референдум ян езара аьлла, хаам бинера Bloоmberg агенталло. Читать дальше...