Маршо Радион тIаьххьара керланаш (17.02.2020)
Прокурор Аслаханов лаьцна, Умаровс жоп делла Чехин, Оьрсийчуьрчу зудчун коронавирус кхетта (Керланаш кечдеш иллюстрацина пайдаоьцу Маршо Радион архивех а, официалан сайташкарчу материалех а).
Прокурор Аслаханов лаьцна, Умаровс жоп делла Чехин, Оьрсийчуьрчу зудчун коронавирус кхетта (Керланаш кечдеш иллюстрацина пайдаоьцу Маршо Радион архивех а, официалан сайташкарчу материалех а).
Стохка Берлинехь Гуьржийчуьра мухIажир Хангошвили Зелимха вийна Соколов Вадим харц цIарца вевзачу Оьрсийчоьнан махкахочо Красиков Вадима Европе вахале тенировкаш йина хилла ФСБ-н "Вымпел" лерринчу тобанан базехь, маситтаза хилла иза Вернадскийн цIарахчу проспектехь ФСБ-н антитерроран урхаллехь, дуккхазза а телефонехула къамелаш дина цо "Выпмпелан" белхахошца. Цунах лаьцна чIагIдеш ду Bellingcat-о а, немцойн журнало Der Spiegel а, Оьрсийчьурчу The Insider зорбан гIирсо а бинчу оршотан дийнахь архецначу талламехь. Читать дальше...
Чиллан-беттан 15-чохь Австрин коьртачу шахьарах хилла Яндарби Зелимха кхелхина 16 шо кхачарна лерина културан суьйре. Оцу гуламе баьхкинчу хьешашлахь бара Зелимхан гергара нах а, цуьнан хилла накъостий а, ткъа иштта Европерчу пачхьалкхашкара хьеший а. Гулам кечбинарг яра Австрера нохчийн «Haus-Husam» юкъаралла.
Японин бердашца лаьттачу "Даймонд Принсес" круизан хIордан кеманна тIехь йолчу Оьрсийчуьрчу зудчун коронавирус карийна лоьрашна, хаам бо Маршо Радион Оьрсийн сервисо, Оьрсийчоьнан цу махкахь йолчу векалаллина тIе а тевжаш. Карарчу хенахь зуда дарбанан цIийне охьайиллина ю. Иза дуьххьарлера Оьрсийчоьнан махкахо ю коронавирус кхетта йолу, оцу лайнер тIехь а, вуьшта а. "Даймонд Принсес" хIордан кеман тIехь ву 3 эзар сов стаг. Ши кIира ду лайнер Иокогаман портехь карантинехь лаьтта.
Москвахь дийцарш дIахьур ду Оьрсийчоьнан а, Туркойчоьнан а делегацийн векалша. Церан тема хир ю тIаьхьарчу деношкахь, тIемаш беш оппозицино Iуналла дечу меттигашна тIедоьлхуш президентан Асад Башаран эскарш а долуш, Шеман къилбаседа-малхбузехь йолчу Идлиб провинцехь хIоьттина хьаьл. Анкарано дийцарехь, Асадан ницкъаша машар барх лаьцна барт бохийна, Оьрсийчоьно а, Туркойчоьно а гаранти луш бина болу.
Нохчийчоьнан къоман политикехула а, арахьарчу уьйрашкахула а, зорбанан а министро Умаров Джамболата шена хетарг довзийтина Чехин премьер-министро Бабиш Андрейс шина республикан цIераш цхьаьтера хилар хьокъехь дIахьедар дарна. "Нохчийн халкъ дIоггара сагатдийр долуш дац, нагахь цхьанна товш дацахь шех нохчо алар", - дIахьедина Умаровс "Говорит Москва" радиостанцин эфирехь йинчу комментарехь. Цо бехкевина Бабиш Малхбузерчу "русофобех а, чеченофобех" а лаьттачу публикина ша везийта гIортарна. ... Читать дальше...
Бер а дуьйш, 4 стаг лаза а веш, бохам хилла Несарахь Чиллан-беттан 16-хь 22 сахьт ах сахьт долуш Тангиевн цIарахчу урамехь, хаам бо "Регион онлайн" сайто. Дуьхь-дуьхьалкхетта Mersedes а, Volkswagen а ши машен. Лазийна 6 адам дIакхачийна Несарарчу клиникан дарбанан цIийне. Дукха хан ялале, кхин метта ца догIуш, делла 4 шо долу бер. Социалан машанашкахь яржийначу видеона тIехь гуш ду дуьхь-духьалкхетта ши машен вуно чIогIа йохийна хилар. Хиллачуьнан бахьана къастош ду.
Красноярскан махкарчу Березовскан кIоштан кхело 2 баттана лаьцна цу кIоштан прокурор Аслаханов Бекхан. Иза а, цуьнан ваша а бехке веш ву цу шиммо бизнесхочуьнгара 500 эзар сом кхаъ эцна а, ахча схьаоьцуш юкъарло лелорна а. Цунах лаьцна оршотан дийнахь хаам бина Красноярскан мехкан кхелан зорбан сервисо. Цу хаамца а догIуш, прокурор Аслаханов лаьцна латтор ву Охан-беттан 13-чу дийне кхаччалц. Иштта кхело 2 баттана чувоьллина кхаъ оьцуш юкъарло лелийна цуьнан ваша Аслаханов Алихан а. Аслаханов Бекханан 35 шо ду... Читать дальше...