Iамеркан Цхьаьнатоьхна Штаташ вуно синтем байна ю «Мемориалан» Нохчийчуьрчу декъан куьйгалхо Титиев Оюб дIалацарна. Цхьаьнатоьхначу Штаташа кхайкхам бина Оьрсийчурчу Iедалшка, сихонца иза дIа a хеца, цуьнан бакъонаш а ларйе аьлла. Цунах лаьцна дуьйцуш ду Iамеркан Пачхьалкхан департаментан дIахьедарехь. Цу тIехь билгалдаьккхина ду, кхерам бу Титиевца мегар доцург лелорна а, иза лаьцна витарна а аьлла.
Дуьненаюкъарчу All Out олучу тобано а, Оьрсийчуьрчу ЛБГТ-н юкъаралло а дуьненаюкъара кампани йолийна, Соьлж-ГIалахь лачкъийна волу 26 шо долу йишлакхархо Бакаев Зеламха лахар доьхуш, Оьрсийчоьнан куьйгалхошка бинчу кхайкхаман кIеллахь куьйгаш гулдеш. Бакаев вайна стохка Марсхьокху-баттахь. Цу хенахь дуьйна цуьнах хиллачух лаьцна хIара ду аьлла хууш хIума дац. 2017-чу шарахь Гезгмашин-баттахь интернетехь видео гучуелира тIехь Бакаев а волуш, иза Германехь волуш санна. Амма цуьнан накъосташа харц дира иза цу пачхьалкхехь хилар.
Европан Кхеташонан адамийн бакъонашкахула волчу комиссаро Муйжниекс Нилса кхайкхам бина Оьрсийчоьнан Iедалшка, "Мемориалан" Нохчийчуьрчу декъан куьйгалхо Титиев Омар мукъаваккха аьлла. Цунах лаьцна Европерчу комиссаро яздина шен Facebook-рчу агIонехь. Муйжниексна хетарехь, Нохчийчуьра бакъонашларъярхо хьийзош ву шеконе бехк а кхоьллина. Нохчийчохь шинарин Iуьйранна лаьцна "Мемориалан" цу республикерчу декъан куьйгалхо Титиев Оюб. Шен доттагIца цхьаьнакхета вахана хилла иза Майртупа. Амма ша воьдучу Титиев дIа ца кхаьчна. Читать дальше...
Социологаша бинчу талламца, 66 процент оьрсийчоьнхой тешна бу Оьрсийчоьнан мостагIий бу бохучух. ТIахьарчу 23 шарахь цу хаттарехула уггаре лакхара гайтам бара 2014-чу шарахь. Оцу шарахь бинчу талламца а догIуш, Оьрсийчоь мостагIаша гоне лаьцна ю аьлла хеташ бара 84 процент респонденташ. Цунах лаьцна хаам бина РБК агенталло, "Левада-центро" бинчу талламна тIе а тевжина. Оьрсийчоьнан коьрта мостагIий лору цу пачхьалкхерчу бахархоша Iамеркан Цхьаьнатоьхна Штаташ а (68 процент), Украина а (29 процент), Евробарт а (14 процент).
Нохчийчоьнан муфтиято керла къеда билгалваьккхина Соьлж-ГIалана. Иза ву Ильясов Адам. Цуьнгахь хир ду республикан муфтийн когаметтан дарж а. Ильясов вовзуьйтуш, муфтийс Межиева Салахь-Хьаьжас билгалдаьккхира цу стага баккхийн кхиамаш баьхна хилар, республика синан-оьздангаллехь кхиорехь.
Тбилисерчу клиникехь дIаваьлла Паьнгазахь талламан операци дIахьош гуьржийн эскархочо герз тоьхна чевнаш йина волу Мачаликашвили Темирлан. Цуьнах лаьцна хаам бина лоьро Лурсманашвили Зазас, яздо "Грузия онлайн" сайто. Лоьро дийцарехь, Мачаликашвили велла тахана, кхаарин дийнахь, Iуьйранна. 19 шо долчу Мачаликашвили Темирланна герз тоьхнера коьртах а, белшах а пачхьалкхан кхерамазаллин сервсисан белхахоша Паьнгаза чIожехь леррина операци дIахьош. Ши кIира гергга хан яьккхира цо кхетамчу ца вогIуш.
Жигимантас Павилионис - Литува пачхьалкхан дипломатин векал, оппозицехь йолчу консервативан партин лидерех цхьаъ. Дуккха а шераш ду мехкан цIарх цо Нохчийчоьнца лелачу юкъаметтигийн доладен. Политико бовхачу безамца дагалоьцу муха дуьйлира гергарлонаш Литуваний, Нохчийчоьний юкъа.
Бохам хилла Шелан кIоштарчу Гермачигахь Дечкен-беттан 9-чу сарахь. Газ иккхина ораматаш кхиаден чоьнехь, хаам бина Нохчийчуьрчу орцаллан министралло. И бахьана долуш вагийна 5 стаг. Уьш дIакхачийна Соьлж-ГIаларчу 4-чу дарбанан цIийне. Болчу хаамца, газ иккхинчул тIаьхьа цIе ца яларна дийна бисина цу чохь хилларш. Орцаллан министраллан белхахой таллам беш бу хилларг хьокъехь.
